Ձեր վստահելի աղբյուրը

«Հաշվի առնելով այն հանգամանքը, որ դատական նիստերի դահլիճ բավականին ուշ եմ մտել, իմ պաշտպանյալ Ներսես Պողոսյանը նիստերի դահլիճում չէ, եթե կարելի է, խնդրում եմ, տեղեկացրեք, թե որն է պատճառը, որ նա  դահլճիում չի»,-  Ժիրայր Սեֆիլյանի, Հրայր Թոփչյանի, Սասունիկ Կիրակոսյանի, Հովհաննես Պետրոսյանի, Գալուստ Գրիգորյանի, Ներսես Պողոսյանի, Գևորգ Սաֆարյանի գործով դատական նիստին ասաց  Ներսես Պողոսյանի փաստաբան  Արայիկ Պապիկյանը:

Նշենք, որ փաստաբանը նիստի սկզբում դահլիճում չէր, քանի որ կարգադրիչները նրան թույլ չէին տվել մուտք գործել այն պատճառով, որ հրաժարվել էր  իր իրերը ստուգելուց:

Փաստաբանն ասաց,  եթե իր պաշտպանյալը դահլիճում չի լինելու, իսկ նա իրեն չի լիազորել, ավելին՝ հանձնարարել է իր բացակայության պայմաններում  իր պաշտպանության  հարցով դատական նիստին չմասնակցել, պարտավոր է լքել նիստերի դահլիճը։

Նիստը նախագահող դատավոր Տաթևիկ Գրիգորյանն ասաց, որ Ն. Պողոսյանը հեռացվել է դատական նիստերի դահլիճից 6 ժամով՝ դատական  նիստի կարգը խախտելու, դատարանի նկատմամբ անհարգալից վերաբերմունք դրսևորելու պատճառով: Նա նաև հայտարարեց, որ Քրեական դատավարության օրենսգրքի 73-րդ հոդվածի համաձայն, պաշտպանը նախ իրավունք չունի ինքնակամ դադարեցնել իր լիազորություններն որպես այդպիսին, պաշտպանը պարտավոր է ենթարկվել դատական նիստը նախագահողի օրինական կարգադրություններին, և մինչև ընդմիջում հայտարարելն առանց նախագահողի թույլտվության չլքել դատական նիստերի դահլիճը:

Արայիկ Պապիկյանն ասաց, որ իրավունք չունի իր պաշտպանյալի շահերին հակասող, նրա հանձնարարություններին հակասող որևէ գործողության դիմել:

«Քանի որ իմ պաշտպանյալը նիստերի դահլիճում չէ, իմ՝ նրա պաշտպանությունն իրականացնելն անհնար է, ստիպված եմ լքել դատական նիստերի դահլիճը»,- հայտարարեց փաստաբանն ու հեռացավ:

Նրա հետ հեռացավ նաև Ներսես Պողոսյանի երկրորդ փաստաբանը: Դահլիճում հնչեցին ծափահարություններ և «Պապիկյան», «Պապիկյան» բացականչություններ:

Դատավորը հայտարարեց, որ դատարանը հեռանում է խորհրդակցական սենյակ՝  պաշտպանի վարքագծի վերաբերյալ համապատասխան որոշում կայացնելու:

Որոշումը կհրապարակվի այսօր ժամը 15:00-ին: