Ձեր վստահելի աղբյուրը

Այսօր ազգային ժողովում «ՀՀ 2016 թ. պետական բյուջեի կատարման մասին» տարեկան հաշվետվության քննարկման ժամանակ «Ծառուկյան» դաշինքի պատգամավոր Սերգեյ Բագրատյանը հետաքրքրվեց, թե որքանո՞վ են արդյունավետ օգտագործվում դրամաշնորհները:

«Վերջերս Եվրամիության կողմից ստացված բավականին մեծ թվով դրամաշնորհները փոշիացվել են: Ստուգվե՞լ են դրամաշնորհների օգտագործման արդյունավետությունը»,- պատգամավորը այս հարցով դիմեց ՀՀ ֆինանսների նախարարի տեղակալ Ատոմ Ջանջուղազյանին:

Փոխնախարարն ասաց, որ, իհարկե, կարող են լինել թերություններ, բայց իրենք այսօր ներկայացրել են ոչ թե ստուգման արդյունքները, այլ այդ միջոցների օգտագործմամբ  ինչ արդյունքներն են արձանագրվել:

«Արդյունավետությունը կարևորագույն հարց է, լուծումներից մեկն այս ձևաչափով ներկայացման, թափանցիկ, հրապարակային լինելու մոտեցումն է, այդ դեպքում հնարավորություն ենք ունենում նաև ունենալ հանրային հսկողություն»,- ասաց Ա. Ջանջուղազյանը:

Սերգեյ Բագրատյանի հաջորդ հարցը վերաբերում էր Սևանա լճից ևս 100 միլիոն խորանարդ մետր ավելի ջուր բաց թողնելուն. «Համաշխարհային բանկից 20 միլիարդից ավելի տրամադրվել է ոռոգման համակարգերին, որից կոնկրետ 5,5 միլիարդ դրամ, նաև ֆրանսիական կառավարությունը 5,2 միլիարդ դրամ է տրամադրել Վեդու ջրամբարի կառուցման համար: Մնացած գումարները  հնարավո՞ր չէր ուղղել ջրամաբարների կառուցմանը, որպեսզի այսօր Սևանա լճից ևս 100 միլիոն խորանարդ մետր ջուր բաց թողնելու տնտեսական անհրաժեշտություն չառաջանար: Եվս մեկ անգամ ուզում ենք հասկանալ՝ ֆինանսական ռեսուրսներն արդյունավետ են օգտագործվո՞ւմ, թե՞ ոչ»:

Ֆինանսների նախարարի տեղակալն ասաց. «Հարցադրման համատեքստն ավելի շատ վերաբերում է նրան, թե արդյո՞ք մենք ճիշտ առաջնահերթություններ ենք ընտրում  ընդհանրապես ծրագրերը ձևավորելիս, թե՞ ոչ: Մենք առաջիկայում  ծրագրերը քննարկելիս կունենանք հնարավորություն անդրադառնալու դրան: Հիմա մենք ներկայացնում ենք այն, ինչ 2016-ի համար որպես առաջնահերթություններ արդեն իսկ սահմանված են եղել և դրա հիման վրա իրականացվել են այս կամ այն ծրագրերը: Հիմա մենք 2016 թիվը փոխել չենք կարող»:

Նշենք, որ ՀՀ կառավարության նախաձեռնությամբ հուլիսի 4-ին գումարվելու է  Ազգային ժողովի արտահերթ նստաշրջան, քննարկվելու է «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» օրենքում լրացումներ կատարելու մասին նախագիծը: Դրանով առաջարկվում է, փոխել օրենքով սահմանված ոռոգման նպատակով լճից 2017 թվականի բացթողման 170 մլն մ3 չափաքանակը՝ այն դարձնելով մինչև 270 մլն մ3: