Ձեր վստահելի աղբյուրը

Երբ Հայաստանի ռազմավարական գործընկեր Ռուսաստանի փոխվարչապետ Դմիտրի Ռոգոզինը հայտարարում է, որ  Թուրքիային զենք մատակարարելու հարցում որևէ խոչընդոտ չկա, խոսքը գնում է ոչ թե ռուսական բիզնես շահի, այլ գլխավորապես ազդեցության  մեծացման և քաղաքական շահի մասին: Զենքի վաճառքը Ռուսաստանին թույլ կտա ավելի մեծ ազդեցություն ունենալ Թուրքիայի վրա, և եթե պետք լինի, ՌԴ-ն Թուրքիային զենք կմատակարարի նույնիսկ առանց գումարի։ Panorama.am-ի թղթակցի հետ զրույցում նման տեսակետ հայտնեց Ռազմավարական և ազգային հետազոտությունների հայկական կենտրոնի ղեկավար Մանվել Սարգսյանը:

«Եթե Ռուսաստանը գործում է իր շահերին համապատասխան, ապա Հայաստանն իր հերթին պետք է մտածի սեփական դիրքորոշումը հստակեցնելու մասին։ Ժամանակին այդ երկրի հետ կառուցվել է հարաբերությունների մի համակարգ, որը սկզբից ևեթ վնասել է մեր երկրի շահերին։ Իհարկե, Ռուսաստանին չպետք է բարեկամ կամ թշնամի հայտարարել, այլ հասկանալով այդ երկրի շահերը՝ այլ հարաբերություններ կառուցել։ Պետք է վտանգ ներկայացնող մի շարք պայմանագրեր լուծարվեն և նորերը կնքվեն, լրիվ այլ հարաբերություններ պետք է կառուցվեն։ Հայաստանը Ռուսաստանի առջև պետք է պայմաններ դնի, որպեսզի իր անվտանգությունը չտուժի»,- նշեց քաղաքագետը։

Մանվել Սարգսյանը նշեց, որ «լրիվ այլ հարաբերություններ կառուցելու» տակ պետք է հասկանալ մի շարք միջոցներ ձեռք առնելը, այդ թվում՝ Հայաստանում ռուսական ռազմաբազայի գործունեության դադարեցումը, ռազմավարական գործունեությունը խաթարող արարքները համապատասխան գնահատականի արժանացնելը։

Հարցին՝ ավելի վտանգավոր է Ռուսաստանի կողմից Ադրբեջանի՞ն, թե Թուրքիային զենք մատակարարելը, մեր զրուցակիցը պատասխանեց՝ վտանգը հավասարազոր է։

«Վտանգը հավասարազոր է, որովհետև Հայաստանը համարժեք սպառազինություն չի ստանում, որովհետև Ռուսաստանն է ուժի բալանսը որոշում և ապահովում։ Մենք ապրում ենք փոփոխությունների դարաշրջանում, և եթե այսօր Թուրքիան Հայաստանի ուղղությամբ չի կրակում, վաղը կարող է կրակել՝ այն էլ ռուսական զենքով։ Էլ չեմ ասում, որ Ադրբեջանն ու Թուրքիան միմյանց հետ ռազմավարական ամենասերտ հարաբերություններն ունեն»,- ասաց Մանվել Սարգսյանը։

Քաղաքագետից նաև հետաքրքրվեցին՝ արդյոք Թուրքիային զենք մատակարարելը նշանակում է, որ Ռուսաստանը չեզոք չէ անկախ Քուրդիստանի ստեղծման հարցում։ Վերջինս նշեց՝ եթե անհրաժեշտություն լինի, Ռուսաստանը նույն հաջողությամբ կարող է զենք վաճառել նաև անկախ Քուրդիստանին։ Այսինքն՝ հավասարազոր ազդեցություն բանեցել ինչպես Թուրքիայի, այնպես էլ անկախության հանրաքվեի պատրաստվող այդ միավորի վրա։

«Մենք ամեն հարցի պետք է նայենք ուժերի բալանսի տեսանկյունից։ Բավական է, որ ԱՄՆ պաշտպանի քրդերին, և Ռուսաստանը կպաշտպանի Թուրքիային։ Սա «նորմալ» միջազգային պրակտիկա է»,- ամփոփեց մեր զրուցակիցը։