Ձեր վստահելի աղբյուրը

«Այսօր բանակն ունի լավագույն ռազմաբժշկական ծառայությունը, ինչը հետևանք է հանրապետությունում  ռազմական բժիշկների մասնագիտական բարձր որակի, հատկապես, եթե դա վերաբերում է վիրաբուժությանը, վերակենդանացման բաժանմունքի աշխատանքին»,-այս մասին այսօր լրագրողների հետ հանդիպման ժամանակ ասաց ՀՀ պաշտպանության նախարար Վիգեն Սարգսյանը:

Նրա խոսքերով,  չնայած վերջին ամիսներին եղել են բազմաթիվ դեպքեր, որոնք զինվորների կյանքի համար սպառնալիք էին, բայց բժիշկների հետևողական աշխատանքի շնորհիվ հնարավոր  եղավ փրկել զինծառայողների կյանքը, վերականգնել նրանց առողջությունը:

Միաժամանակ նախարարն ասաց, որ դեռ շատ անելիքներ կան, թեև բժիշկների մասնագիտական որակավորումը շատ բարձր է, այդուհանդերձ, ընդհանուր բժշկական ծառայության կազմակերպումը դեռ բազմաթիվ բացեր ունի՝ սկսած վարչարարությունից, վերջացրած գերժամանակակից տեխնոլոգիաների ներդրմամբ: Այս ուղղությամբ ևս ունեն ծրագրեր, որոնք առաջիկայում կփորձեն կյանքի կոչել:

Պաշտպանության նախարարը նաև հայտնեց, որ առողջապահության նախարարության հետ քննարկում են Վարդենիսի, Սիսիանի և Բերդի զինվորական հոսպիտալների և  քաղաքացիական հիվանդանոցների միավորման հարցը:

«Հոսպիտալները շատ ավելի լավ են հագեցած, քան քաղաքացիական հիվանդանոցները,  հաճախ քաղաքացիները բուժօգնության համար դիմում են  հոսպիտալներ: Հոսպիտալները  մեզ համար ռազմավարական նշանակություն ունեն, բայց որպեսզի այդ ներուժը  չպահենք զուտ պոտենցիալ հեռանկարի համար, ուստի նպատակահարմար է, որպեսզի քաղաքացիական բնակչությանը լիարժեք ծառայություն կարողանանք մատուցել: Դա է միավորման նպատակը»,- նշեց Վիգեն Սարգսյանը:

Անդրադառնալով Երևանի կենտրոնական կլինիկական զինվորական հոսպիտալի պետի փոփոխությանը՝  նախարարն ասաց, որ հոսպիտալի հետ կապված ունեցել է մի շարք մտահոգություններ՝ սկսած կենցաղային, սանիտարական  որոշ պայմաններից, մինչև որոշակի կարգ ու կանոնի խնդիրներ:

«Կար որոշակի միտում, որը մեզ մտահոգում էր, մասնավորապես, բուժման արհեստական երկարացման, արձակուրդում գտնվող զինծառայողների վերջին օրը մասսայական հիվանդանալու և բազմաթիվ այլ երևույթներ, որոնք պատիվ չէին կարող բերել ռազմաբժշկական ծառայությանը»,- ընդգծեց նախարարը:

Ինչ վերաբերում է հոսպիտալի նորանշանակ պետին՝ Դանիել Մկրտչյանին, Վիգեն Սարգսյանն ասաց, որ նրան այդ պաշտոնում նշանակել է՝ հաշվի առնելով մի շարք ուսուամնասիրություններ:

«Ես ուսումնասիրել եմ բոլոր այն բժիշկ-սպաների թեկնածությունը, որոնք ունեն համապատասխան չափորոշիչներ, և կանգ եմ առել Սիսիանի հոսպիտալի պետի վրա, որի աշխատանքն ինձ տպավորել է հոսպիտալ կատարած այցելության ժամանակ: Սիսիանի հոսպիտալը կարող է պատիվ բերել ցանկացած երկրի Զինված ուժերին, ինչպես նաև ցանկացած քաղաքացիական բուժհաստատությանը»,- նշեց Վիգեն Սարգսյանը: