Ձեր վստահելի աղբյուրը

«Ես երեկ ուշ երեկոյան հանդիպել եմ իմ պաշտպանյալի՝ Արարատ Խանդոյանի հետ: Նա շատ վատ վիճակում էր»,-այսօր լրագրողների հետ հանդիպման ժամանակ հայատարարեց փաստաբան Արա Ղարագյոզյանը:

Փաստաբանի խոսքով, Խանդոյանն իրեն պատմել է, որ Ավան և Նոր Նորք վարչական շրջանների ընդհանուր իրավասության դատարանում ենթարկվել է ծեծի,  Արեգ Կյուրեղյանը, Սմբատ Բարսեղյանը, Գագիկ Եղիազարյանը ևս:

«Դաժան ծեծի նրանք ենթարկվել են ոստիկանության կողմից, մոտավորապես 15-20 ոստիկան հարձակվել ու հարվածել են,  իմ պաշտպանյալի աչքին, գլխի հատվածում, ողնաշարի հատվածում, ոտքերի վրա կային վնասվածքներ, աչքը կապտած էր: Առանձնապես դաժան հարվածներ են եղել գլխի շրջանում»,-ասաց նա:

Փաստաբանը նշեց, որ սահմանը պաշտպանելիս Արարատ Խանդոյանը ձեռք է բերել առողջական խնդիրներ և  կարծիք հայտնեց, որ այդ մասին շատ լավ իմանալով ոստիկանությունը  որոշել է, թե մարմնի որ մասերին հարվածի. «Այս ամենը տեղի է  ունենում դատարանում, որտեղ քաղաքացիները փնտրում են արդարադատություն»:

Ղարագյոզյանն ասաց, որ այսօր հաղորդում է ներկայացնելու հանցագործության մասին: «Նուբարաշեն» ՔԿՀ-ում եզրակացություն է կազմվել բժշկի կողմից:

«Պետք է դիմենք գլխավոր դատախազություն, բայց համոզված եմ, որ խոշտանգման մասով արդյունավետ քննություն չի իրականացվելու, դիմելու ենք Եվրոպական դատարան: Ակնհայտ է, որ սա իրականացվում է իշխանությունների պատվերով, սա հետընթաց է»,-ասաց նա: