Ձեր վստահելի աղբյուրը

Երևանի Շենգավիթ վարչական շրջանի ընդհանուր իրավասության դատարանում այսօր շարունակվելու է  Ժիրայր Սեֆիլյանի, Հրայր Թոփչյանի, Սասունիկ Կիրակոսյանի, Հովհաննես Պետրոսյանի, Գալուստ Գրիգորյանի, Ներսես Պողոսյանի, Գևորգ Սաֆարյանի գործով  դատավարությունը:

Դատարանի մուտքի մոտ էին Փաստաբանների պալատի նախագահ Արա Զոհրաբյանը, ՀՀ դատական դեպարտամենտի ղեկավար Կարեն Փոլադյանը:

Դատարանի մուտքի մոտ փաստաբան Տիգրան Հայրապետյանին դատական կարգադրիչները  դարձյալ ցանկացան ստուգել, ինչպես նախորդ դեպքերում: Նա կրկին դժգոհություն հայտնեց:

«Պարոն Փոլադյան, որպես արգելված իր, որքանով հասկանում եմ, ձեզ հետաքրքրում է զենք զինամթերք»,- հարցրեց Արա Զոհրաբյանը:

«Այն իրերը, որոնք կարող ենք իրենցից վտանգ ներկայացնել»,- պատասխանեց Տ. Փոլադյանը:

«Ամենյան պատասխանատվությամբ հայտարարում եմ, որ չունեմ այդպիսի իր, որը կարող է վտանգ  ներկայացնել»,- նշեց Տ. Հայրապետյանը:

Արա Զոհրաբյանի խոսքով, համոզված են, որ ճիշտ է ասում, բայց խնդրեց, հետայսու նման խնդիր չսարքել, որպեսզի դատական կարգադրիչներն իրենց լիազորություններն իրականացնեն:

Փաստաբանը դիմելով Կ. Փոլադյանին ՝ խնդրեց բացատրել, թե ինչով է տարբերվում պայուսակի զննությունը  պայուսակի խուզարկությունից:

«Համոզված եմ՝ լավ գիտեք, որն է զննությունը, որը խուզարկությունը»,- ասաց ՀՀ դատական դեպարտամենտի ղեկավարը:

Այնուհետև ասաց. «Պարոն Հայրապետյան, համեցեք նիստերի դահլիճ հատուկ պարոն Զոհրաբյանի ներկայության կապակցությամբ»:

«Շնորհակալություն պարոն Զոհրաբյան: Պետք է խնդրեմ, որ միշտ ներկա գտնվեք»,- ասաց փաստաբան Հայրապետյանը:

Կ. Փոլադյանը լրագրողներին ասաց, որ փաստաբանները, մեղադրողները, դատական նիստերի դահլիճ, ընդհանրապես դատարան մուտք գործող յուրաքանչյուր անձ ենթարկվելու է զննություն, ինչպես այսօր զննության ենթարկվեց պարոն Հայրապետյանը: