Ձեր վստահելի աղբյուրը

Հունիսի 16-ին Արցախում գլխի հրազենային թափանցող վիրավորում ստացած ժամկետային զինծառայող Յուրի Զաքարյանի առողջական վիճակում դրական դինամիկա կա: Այս մասին Panorama.am-ի թղթակցին հայտնեց ՀՀ ՊՆ կենտրոնական կլինիկական զինվորական հոսպիտալի փոխտնօրեն Արտաշես Խաչատրյանը:

«Վիճակը կայունացել է, դեպի լավն է գնում, գիտակցությունը տեղն է, ոտքերը, ձեռքերը շարժում է, այսինքն՝ տարրական հրահանգերին արձագանքում է»,- ասաց հոսպիտալի փոխտնօրենը: 

Ինչ վերաբերում է մյուս զինծառայողին՝ Արմեն Վարդանյանին, որը նույնպես վիրավորվել է հունիսի 16-ին, նրա առողջական վիճակը գնահատվում է բավարար: Արմենն արդեն տեղափոխվել է հիվանդասենյակ:

Արտաշես Խարատրյանը հայտնեց, որ այս պահին երկու զինվորներին էլ վիրահատություն չի սպասվում:

Նշենք, որ ժամկետային զինծառայող Յուրի Զաքարյանը ստացել էր գլխի հրազենային թափանցող վիրավորում, Արմեն Հարությունյանը` գլխի ականապայթյունային վիրավորում:

Հիշեցնենք, որ հունիսի 16-ին՝ ժամը 18:05-ի սահմաններում, հակառակորդը հաստոցավոր հակատանկային նռնականետերից խախտել է հրադադարի պահպանման ռեժիմը  ՊԲ կենտրոնական ենթակայության զորամասերից մեկի պահպանության տեղամասի ուղղությամբ, ինչի հետևանքով մահացու վիրավորումներ էին ստացել 1997 թվականին ծնված ՊԲ զինծառայողներ Արայիկ Մատինյանը,  Վիգեն Պետրոսյանը, Վարդան Սարգսյանը : Երեք զինծառայող՝  Արմեն Վարդանյանը, Յուրի Զաքարյանը, Մյասնիկ Հովհաննիսյանը վիրավորվել էին: