Ձեր վստահելի աղբյուրը

Ամառային ալերգիան սեզոնային բնույթ է կրում, դրա հիմնական պատճառը ծաղկափոշին է: Այն, շնչուղիներով ընկնելով մեր օրգանիզմ, ստեղծում է գերզգայուն վիճակ՝ դրսևորվելով հարբուխանման նշաններով, փռշտոցով: Այսօր տեղի ունեցած մամուլի ասուլիսի ժամանակ այս մասին ասաց ալերգոլոգ Զարուհի Կալիկյանը՝ միաժամանակ ալերգիկներին խորհուրդ տալով հնարավորինս հազվադեպ մեկնել քաղաքից դուրս՝ բնության գրկում ժամանակ անցկացնելու:

Նրա խոսքով, ամառային ալերգիայի հարցում որոշակի նշանակություն ունի նաև արևը.  «Ալերգիկ երևույթներ երբեմն առաջացնում են նաև որոշ մրգեր՝ կեռասը, ծիրանը, թութը: Ալերգիան խրոնիկ վիճակ է, որը մարդուն ուղեկցում է ամբողջ կյանքի ընթացքում: Կան որոշ տեսակներ, որոնք տրվում են բուժման, սակայն լինում են նաև դեպքեր, երբ գործ ունենք սուր ալերգիկ ռեակցիաների հետ»:

Զարուհի Կալիկյանի խոսքով, ալերգոլոգի առաջնահերթ խնդիրն է ապահովել մարդու կյանքի որակը՝ թեթևացնելով ախտանշանները: Ինքնաբուժումը չի խրախուսվում, ալերգիկ ֆոնի ի հայտ գալուն պես պետք է անպայման դիմել մասնագետի, այլապես որոշ դեպքերում ալերգիան կարող է վերաճել ընդհուպ բրոնխիալ ասթմայի և անաֆիլակտիկ շոկի:

Մասնագետը նշեց՝ ալերգիա ունենալն ամենևին չի նշանակում, որ մարդը թույլ իմունիտետ ունի: Պարզապես ալերգիկների իմունիտետը գերզգայուն է: