Ձեր վստահելի աղբյուրը

«Տրամադրություններս շատ բարձր ա, սաղ չյոտկի ա»,-Զինվորական հավաքակայան մեկնած լրագրողներին վստահեցնում են տղաները:

Այս պահին ամառային զորակոչի առաջին մեկնողները վիճակահանություն են կատարում: Տարայից դուրս եկած թղթի վրայի գրությամբ է որոշվելու՝ որտեղ են երկու տարի զինվորական ծառայություն անցնելու երիտասարդները:

Տղաների բարձր տրամադրության մասին խոսքերից ուրախանում է ՀՀ ԶՈՒ ԳՇ պետը. «Լսեցի՞ք»:

Առաջին մեկնողների հետ խոսելու, նրանց խորհուրդներ, հարցեր ու նաև խոստումներ տալու համար հավաքակայան  եկած Մովսես Հակոբյանը բավարարված է. «Շատ ոգևորիչ է, որ բոլորը տրամադրված գնում են հայրենիքին ծառայելու: Ինչ տրամադրությամբ գնում են ծառայելու, նույն տրամադրությամբ կվերդառնան իրենց ծնողների մոտ»:

Հակոբյանը տղաներին հիշեցնում է՝ պարտավորված են, պետք է արժանի լինեն իրենց ավագ սերնդին, կարողանան պահել, պահպանել և բազմապատկել ավագ սերնդի ստեղծածը:

«Նրանց ծնողների մեծ մասը կերտել է մեր անկախությունը, կարծում եմ, նրանք պատասխանատվության զգացումով են գնում, չեն կարող ավելի պակաս լինել ավագ սերնդից, պետք է ապացուցեն, որ արժանի են ավագ սերնդին: Համարձակ և ուժեղ լինել, ուժեղ հոգեպես, ֆիզիկապես և գիտելիքի առումով»,-նորակոչիկներին հորդորում է Հակոբյանը:

Փորձառու զինվորականը դեռ անփորձներին բացատրում է. «Ուժեղը նա է, ով տիրապետում է զենքին, մարտի դաշտում կարող է լավ խուսավարել: Դրանով է ձեր ոգին բարձր, դրանով եք ուժեղանում: Խոսելով, բառերով երբեք ոգի չի ձևավորվում: Առաջին ականի պայթյունի ժամանակ կամ առաջին փամփուշտը, որ ձեր ականջի տակով վզզում է, խոսքերը միանգամից լռում են, գործում է բազկի ուժը, արհեստավարժ կրակելը և մարտի դաշտում խուսավարելը»:

Չի թաքցնում, զինվորներին խոստում է տվել՝ զինվորի կողքին է լինելու, իր գործունեությամբ աջակցելու է, որպեսզի նրանք կարողանան կատարել իրենց պարտականությունները:

Գլխավոր շտաբի պետը նորակոչիկներից հետաքրքրվում է նրանց ֆիզիկական պատրաստվածության մասին: Պարզվում է՝ նրանցից մեկը ծանրամարտով է զբաղվել:

«Հենա որ թուրքը մտնի խրամատը, վերցնում ես ու շպրտում»,-կատակում է Հակոբյանը:

Տղաներից մեկը պատանի երկրապահ է եղել: Արագ նկատում ու թվարկում է զինվորական նոր  կոշիկի առավելությունները՝ թեթև է, կաշի է, ավելի հարմար է:

Հորդորներից բացի, Մովսես Հակոբյանը նաև իր ցանկություններն է հայտնում, ակնկալում, որ առաջիկայում դրանք իրականություն կդառնան:

«Առաջին հերթին ցանկանում եմ, որ բոլորը զորակոչվեն բանակ, տարկետումը վերանա: Նախազորակոչային տարիքի երիտասարդների առողջության վրա ուշադրություն դարձվի, որովհետև զորակոչվում են բավականին մեծ թվով զինծառայողներ, որոնք ունեն որոշակի հիվանդություններ, իսկ մի մասին ընդհանրապես տարկետում է տրվում՝ երկարատև բուժման համար, հետագայում նրանցից որոշները պիտանի չլինելով ծառայությանը, զորացրվում են»,-ասաց նա ու հույս հայտնեց, որ առաջիկայում այդ խնդիրների ուղղությամբ միջոցառումների ականատես կլինենք:

«Մենք որոշակի վերլուծություն ենք կատարում նորակոչիկի ծնված օրվանից, որտեղ է դպրոց գնացել, որտեղ է բուժվել, որտեղ է անձնագիր ստացել… Այս ողջ գործընթացը վերահսկվելու է»: