Ձեր վստահելի աղբյուրը

Ավան և Նոր Նորք վարչական շրջանների ընդհանուր իրավասության դատարանում շարունակվում է  «Սասնա ծռերի» 18 անդամների գործով դատական առաջին նիստը: Հայտարարված ընդմիջումից հետո, երբ դատավոր  Արտուշ Գաբրիելյանը ներս մտավ նիստերի դահլիճ, ամբաստանյալները ոտքի չկանգնեցին:

Մինչ այդ, նրանք երկրորդ ընդմիջումից հետո նույնպես ոտքի չէին կանգնել և դատավորը, բացի ամբաստանյալ Արամ Մանուկյանի, ով, ինչպես նշեց դատավոր Արտուշ Գաբրիելյանը, ձեռնափայտով է, առողջական խնդիր ունի, դատական սանկցիա կիրառեց՝ նախազգուշացում, դատարանի նկատմամբ անհարգալից վերաբերմունք դրսևորելու պատճառով:

Այս անգամ նույնպես դատական սանկցիա կիրառվեց 16 ամբաստանյալի նկատմամբ՝ Տիգրան  Սարգսյանի,  Հովհաննես  Վարդանյանի, Արամ  Հակոբյանի, Վարդան  Գերավետյանի, Գևորկ  Իրիցյանի, Տիգրան Մանուկյանի, Թորոս  Թորոսյանի, Արթուր  Մելքոնյանի, Արթուր  Սողոմոնյանի, Գառնիկ  Հովակիմյանի, Արայիկ  Հակոբյանի, Մարտիրոս  Հակոբյանի, Թաթուլ  Թամրազյանին, Հովհաննես  Հարությունյանի, Մանվել  Աթոյանի, Վարդգես  Գևորգյանի  նկատմամբ՝ նրանց հեռացնելով դահլիճից: Պատճառը կրկին նույնն էր՝ անհարգալից վերաբերմունք դատարանի նկատմամբ: Սերգեյ Կյուրեղյանի նկատմամբ դատարանը կիրառեց սանկցիա՝ նախազգուշացում:

Այնուհետև փաստաբանների մեկը կրկին բարձրաձայնեց, որ որոշ ամբաստանյալների պաշտպաններ ներկա չեն:

«Դուք հետաձգեցիք նիստը պաշտպանների ներկայություն ապահովելու համար: Ինչո՞ւ հետաձգեցիք, եթե այդ պահին չեք  անդրադառնում պաշտպանների ներկայությունը: Դրանով ևս մեկ անգամ ապացուցում եք, որ անկողմնակալ լինել չեք կարող: Դուք միանգամից դիմում գրեք ձեզ վարույթից հեռացնեն: Չեք կարողանում ապահովել»,- ասաց փաստաբանը՝ դիմելով դատավոր Ա.Գաբրիելյանին:

Այնուհետև դատավորը կարդաց դատական կարդադրիչներից մեկի կողմից ներկայացված արձանագրության, ով նշել է, որ Դատական օրենսգրքի համապատասխան հոդվածով ցանակցել է զննության ենթարկել փաստաբան Մոնիկա Մարգարյանին, վերջինս հրաժարվել է:

«Հաշվի առնելով, որ Մոնիկա Մարգարյանը պատշաճ տեղեկացվել է դատական նիստի տեղի և ժամի մասին, սակայն անհարգալից պատճառով այս պահին չի ուզում մտնել դատական նիստի դահլիճ՝ դատարանը հեռանում է խորհրդակցական սենյակ՝ դատական ակտ կազմելու»,- հայտարարեց նախագահող դատավորը:

Լրագրողներին փաստաբան Գրիշա Բալասանյանն ասաց, որ դատավորը փասաբաններից մեկին անդրադաձավ, բայց 3 պաշտպան բացակա էին, նրանց ընդհանրապես չանդրադարձավ: Փաստաբանի խոսքով, պաշտպաններին թույլ չեն տվել մտնել նիստերի դահլիճ. «Ավելի ճիշտ փաստաբանները հրաժարվել են մասնակցել խուզարկության-գործընթացին, որը թաքցնում են զննության անվան տակ»:  

Նշենք, որ նիստի մեկնարկին փաստաբաններ Մոնիկա Մարգարյանը, Ինեսսա Պետրոսյանը և Մուշեղ Շուշանյանը չէին մտել դատական նիստերի դահլիճ՝ իրենց խուզարկելու պատճառաբանությամբ:

«Ստացվում է, որ հիմա մենք մասնակցում ենք մի ներկայացման՝ պաշտպանները չկան, մեղադրյալները չեն լիազորել, որ պաշտպաններն առանց իրենց ներկայության ինչ-որ բաներ անել»,- ասաց փաստաբան Գ.Բալասանյանը:

Նա նշեց, որ այս դատավորը, այս դատարան այս կազմով չի կարող օբյեկտիվ լինել, դատավորն ինքնըստինքյան  դարձել է դատավորության կողմ, աշխատում է ի վնաս պաշտպանական կողմի: 

«Պատկերացո՞ւմ եք՝ եթե դատախազներից մեկը չլիներ ու շարունակեր նիստը: Մեկ րոպե անգամ չէր շարունակի, իսկ հիմա առանց պաշտպանների շարունակում են նիստը: Ասում է՝ այս պահին կարևոր չէ, կգան կկրկնենք»,- ասաց փաստաբան Բալասանյանը: 

Խորհրդակցական սենյակից վերադառնալուց հետո դատավոր Գաբրիելյանը  հայտարարեց, որ ամբաստանյալ Տիգրան Մանուկյանի պաշտպան Մոնիկա Մարգարյանի նկատմամբ կիրառվում է դատական սանկցիա՝ պատասխանատվության ենթարկելու վերաբերյալ դիմումով դիմել Փաստաբանական պալատ: 

Այնուհետև դատավորը ասաց, որ, հաշվի առնելով, որ փաստաբան Կարապետ Բադալյանն առանց դատավորի թույտվության լքել է նիստի դահլիճը, օրենքով սահմանված կարգով վերջինիս վարքագծի հետ կապված հարցը լուծելու համար դատարանը գնում է խորհրդակցական սենյակ: 

Խորհրդակցական սենյակից վերադառնալուց հետո դատավորը հայտարարեց, որ դատական սանկցիա է կիրառվում փաստաբան Կարապետ Բադալյանի նատմամբ՝ պատասխանատվության ենթարկելու վերաբերյալ դիմումով դիմել Փաստաբանական պալատ: