«Սասնա ծռերի» 15 անդամ հեռացվեց դատական նիստերի դահլիճից

Իրավունք 18:45 03/07/2017 Հայաստան

«Սասնա ծռերի» 18 անդամի գործով դատական առաջին նիստի ընթացքում դատավոր Արտուշ Գաբրիելյանը ամբաստանյալներից 15-ին վեց ժամով հեռացրեց նիստերի դահլիճից՝ դատարանի նկատմամբ անհարգալից վերաբերմունք դրսևորելու համար: Նրանք նախագահող դատավոր Գաբրիելյանի՝ նիստերի դահլիճ մտնելու ժամանակ ոտքի չէին կանգնել: Ամբաստանյալներ Հովհաննես Հարությունյանի, Թաթուլ Թամրազյանի և Արամ Մանուկյանի նկատմամբ սանկցիա չկիրառվեց, քանի որ, դատավորի խոսքով, նրանք առողջական խնդիրներ ունեն և կանգնել չեն կարող:

«Դատարանը մեզ չի ուզո՞ւմ լսել, թե մենք ինչ ենք ասում։ Դատարանը չի ապահովում անվտանգությունը»,- դիմելով դատավորին՝ ասաց ամբաստանյալ Վարդան Գերավետյանը:

Մինչ այդ դատարանը վերադառնալով խորհրդակցական սենյակից` դատավոր Արտուշ Գաբրիելյանը հայտարարեց, որ պաշտպաններ Նինա Կարապետյանցը, Արայիկ Պապիկյանը և Դավիթ Գյուրջյանն անհարգալից վերաբերմունք են դրսևորել և դատարանի նկատմամբ և դատարանը որոշել է նրանց նկատմամբ դատական սանկիցա կիրառել՝ պատասխանատվության ենթարկելու վերաբերյալ դիմումով դիմել Փաստաբանական պալատ:

Հաջորդ դատական նիստը տեղի կունենա հուլիսի 6-ին:

Հիշեցնենք, որ Ավան և Նոր Նորք վարչական շրջանների ընդհանուր իրավասության դատարանում այսօր մեկնարկել է «Սասնա ծռերի» 18 անդամների՝ Տիգրան Սարգսյանի, Հովհաննես Վարդանյանի, Արամ Հակոբյանի, Վարդան Գերավետյանի, Սերգեյ Կյուրեղյանի, Գևորկ Իրիցյանի, Տիգրան Մանուկյանի, Թորոս Թորոսյանի, Արթուր Մելքոնյանի, Արթուր Սողոմոնյանի, Գառնիկ Հովակիմյանի, Արայիկ Հակոբյանի, Մարտիրոս Հակոբյանի, Արամ Մանուկյանի, Թաթուլ Թամրազյանին, Հովհաննես Հարությունյանի, Մանվել Աթոյանի, Վարդգես Գևորգյանի գործով դատական առաջին նիստը։

ՊՊԾ գնդի շենքի զավթման գործով 14 մեղադրյալների մասով անջատված գործի դատավարությունը մեկնարկել էր ավելի վաղ:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: