Ձեր վստահելի աղբյուրը

«Նորանկախ Հայաստանի պատմության մեջ ես չեմ հիշում որևէ ժամանակաշրջան, երբ Սևանա լճից ջրառ իրականացնելու հարցը չի քննարկվել միմյանց հակասող կարծիքների բախման միջավայրում»,- այս մասին այսօր խորհրդարանում հայտարարեց ՀՀԿ խմբակցության պատգամավոր Արման Սաղաթելյանը:

Նրա խոսքերով՝ մինչև անկախությունն էլ այս հարցը քննարկվել է, բայց հիմնականում իշխանության կուլուարներում:

«Հետևաբար, կարող ենք ենթադրել, որ հարցը միշտ եղել է: Ավելին, մարդկության ի հայտ գալուց ի վեր մարդկության ազդեցությունը շրջակա միջավայրի վրա խնդրահարույց է և անթրոպոգեն գործոնը շարունակում է մնալ բնության համար ամենավտանգավոր գործոններից մեկը»,- նշեց պատգամավորը:

Ըստ Արման Սաղաթելյանի՝ տարաձայնությունները, որոնք կան հարցի շուրջ, ունեն մեկ խնդիր՝ միևնույն խնդրի վերաբերյալ տարբեր տեսանկյունից դիտարկում իրականացնելն է, տարբեր կերպով այն ընկալելն է:

«Անշուշտ, Սևանը էկոհամակարգ է, էներգետիկական օբյեկտ է, ոռոգման ջրի որոշակի պաշար է, քաղցրահամ ջրի խոշոր լողավազան, ձկնաբուծական առումով մեծ պոտենցիալ ունեցող վայր, ինձ համար հանգստի և  առագաստային սպորտաձևի հարթակ: Հասկանալի է, որ հակադրելով այս տարբեր ընկալումները մենք երբեք ընդհանուր հայտարարի չենք գա»,- ասաց պատգամավորը:

Արման Սաղաթելյանի խոսքերով՝  հավելյալ ջրառը, բնականաբար, կազդի էկոհամակարգի վրա և բնական է, որ բնապահպանության նախարարության եզրակացությունը պետք է բացասական լիներ:

Հիշելով 90-ականները՝ նա նշեց, որ օրինակ՝ կային մարդիկ, որոնք ընկալում էին ծառը որպես ջերմություն տվող օբյեկտ, այն դեպքում, երբ իր համար այն էսթետիկական արժեք ունեցող երևույթ էր:

«Այսինքն՝ բոլորիս ընկալումները տարբեր էին: Իմ երեխաները, երբ կով էին տեսնում, ուրախանում էին, ասում էին՝ վայ, կովիկ, բայց գյուղաբնակի համար կովը ապրուստի միակ միջոցն էր: Քաղաքաբնակի ու գյուղաբնակի ընկալումները տարբեր են: Ավելին՝ մսավաճառը մեկ տեսանկյունից է նայում կովին, կենդանաբանը՝ այլ, իսկ որոշ մարդկանց համար դա սննդի աղբյուր է: Հասկանալի է, որ խնդիրներն ակնհայտ են, իսկ բախումը լինելու է միշտ»,- ասաց Արման Սաղաթելյանը:

Պատգամավորի խոսքերով՝ նույնիսկ ունենալով նախարարության բացասական եզրակացությունը, կառավարությունը պետք է ծանրութեթև անի, որպեսզի հասկանա՝  ինչի կհանգեցնի որոշման ընդունումն ու չընդունումը:

Միաժամանակ Արման Սաղաթելյանը նշեց՝ ակնհայտ է, որ որոշման չընդունումը կհանգեցնի ավելի լուրջ հետևանքների, քան ընդունումը: