Ձեր վստահելի աղբյուրը

«Այս նախագծի շուրջ առաջացավ խնդիր, քանի որ կառավարությունը չի կարողանում  հստակ ձևակերապել իր ասելիքը»,-Ազգային ժողովի արտահերթ նիստում  «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» ՀՀ օրենքում լրացումներ կատարելու մասին» օրենսդրական նախագծի քննարկմանն ասաց «Ծառուկյան» խմբակցության անդամ Նաիրա Զոհրաբյանը:

Նրա խոսքով, բնապահպանները վստահ են, որ այս նախագիծը բացարձակապես չի լուծում գյուղացիական տնտեսությունները ոռոգման ջրով ապահովելու խնդիրը, որովհետև կառավարությունը չի կարողանում հիմնավորել, այլ այստեղից-այնտեղից կպցրած հիմնավորումներ է ներկայացվում:

«Հստակ ձևակերպեք խնդիրը, որպեսզի խորհրդարանը կողմնորոշվի, թե ինչպես է քվեարկելու, այլապես հասկանալի չէ, թե ինչու եք այստեղ կանգնած դուք, ոչ թե բնապահպանության նախարարը, հասկանալի չէ բնապահպանության նախարարության ոչ միանշանակ դիրքորոշումն այս նախագծին, որն օբյեկտիվորեն առաջացնում է  հարցեր թե քաղհասարակության, թե հանրության մեջ այս նախագծի այլ նպատակների մասին»,- նշեց պատգամավորը՝ դիմելով հիմնական զեկուցող ՀՀ էներգետիկ ենթակառուցվածքների և բնական պաշարների նախարարության ջրային տնտեսության պետական կոմիտեի նախագահ Արսեն Հարությունյանին:

Միաժամանակ Ն. Զոհրաբյանը նշեց, որ իրենք գյուղացիներից ստանում են ահազանգեր, որ կա ոռոգման խնդիր:

Արսեն Հարությունյանն ասաց, որ ինքն է ներկայացնում նախագիծը, քանի որ ջրային համակարգի պատասխանատուն ջրային տնտեսությունն է, ոչ թե բնապահպանության նախարարությունը, գլոբալ առումով ջրի օպերատորը ջրային կոմիտեն է:

«Բնապահպանության նախարարությունն այս ամենի պարզապես էկոմասն ապահովող կառույց է, նախարարությունը  պարզապես ֆիքսել է, որ Սևանա լճից ջրի հավելյալ քանակի բացթողումը կարող է էկոհամակարգի վրա ազդեցություն թողել»,- նշեց հիմնական զեկուցողը՝ միաժամանակ հավելելով, որ Սևանա լճից 100 լիտր ավելի ջուր բաց թողելը էկոհամակարգի վրա ազդեցություն է թողնում:

«Մենք հիմա կշեռքի նժարին  դնում ենք երկու հարց. ի՞նչն է կարևոր՝  հնարավորություն  տանք, որ գյուղացին ունենա ոռոգման ջուր, թե հավելյալ 10 սմ բարձրացնենք, ինչի արդյունքում շուրջ 130 հազար շահառուների կթողնենք առանց ջրի»,- ասաց Ա. Հարությունյանը:

Պատգամավոր  Նաիրա Զոհրաբյանն արձագանքեց. «Քանի որ կառավարությունը փորձում է ոչ ուղիղ, ոլոր-մոլոր ճանապարհով ձևակերպումներ ներկայացնել, առաջանում է այս թյուրըմբռնումն ըստ իսկ շատ  պարզ հարցի վերաբերյալ՝ ընտրություն վատի և վատթարագույնի միջև. կամ զրկում ենք այդ  մարդկանց ջրից, կամ տալիս ենք այդ մարդկանց ջուր, որը կարող է, այո, առաջացնել որոշակի հետևանքներ: Արդեն մենք կորոշենք, թե այդ ընտրությունն ինչպես կկատարենք»:

Ի պատասախան ՀՀԿ-ական պատգամավոր Ռուզաննա Մուրադյանի հարցին, թե ներկայացված նախագծով էկոհամակարգի առումով կորուստները քիչ են լինելու, ինչը նշանակում է, որ բավականին արդյունավետ նախագիծ է ներկայացված, եթե այդպես է՝ հիմնավորեք, Ա. Հարությունյանն ասաց. «Պետք է ասեմ, որ, այնուամենայնիվ,  էկոհամակարգի վրա որևէ ազդեցություն թողնելու է: Բայց այն խնդիրը, որը մենք բարձրացրել ենք, շատ ավելի կարևոր է, մեծ հարց է լուծում 130 հազար շահառուի համար, քան էկոհամակարգի վրա որևէ ազդեցությունը»: