Ձեր վստահելի աղբյուրը

«Հարցը, որն այսօր այստեղ քննարկվում է, ունի հասարակական մեծ հնչեղություն և կարևորություն, ուստի շատ բնական եմ համարում, որ այս դահլիճում կան տարբեր կարծիքներ»,- այսօր Ազգային ժողովում Սևանա լճից լրացուցիչ 100 մլն խմ ջրառ իրականացնելու նախագծի քննարկման ժամանակ ասաց  Ազգային ժողովի փոխնախագահ Էդուարդ Շարմազանովը:

ԱԺ փոխնախագահը գտնում է, որ դրանք մտահոգ պատգամավորների կարծիքներ են, որոնց համար կարևոր է Սևանա լճի ճակատագիրը, էկոհամակարգի վիճակը, գյուղացիների, քաղաքացիների խնդիրները:

Էդուարդ Շարմազանովի խոսքերով՝ այսօր եկել հանգել են մի հանգրվանի, որտեղ Սևանի էկոհամակարգը մի կողմում է, ոռոգման խնդիրը, ժողովրդի առջև ծառացած խնդիրները մյուս կողմում են և դրանք օպերատիվ լուծում են պահանջում:

«Ես կփորձեմ խոսել հին հունական ոճով, այսինքն՝  ես հարց կտամ ու ինքս էլ կպատասխանեմ: Արդյոք Սևանա լիճը ազգային հարստություն է, թե ոչ: Միանշանակ՝ այո: Մենք պետք է հո՞գ տանենք Սևանի մասին, իհարկե՝ այո: Մենք քայլեր ձեռնարկե՞լ ենք դրա համար, թե ոչ: Այստեղ կարող ենք ունենալ տարբեր կարծիքներ, ես կբերեմ կոնկրետ փաստեր. 2007թ.-ին Սևանա լճի մակարդակը եղել է 1898 մ, 24 սմ, 2017թ.-ին՝ 1900 մ 41 սմ: Այսինքն՝ այն կարծիքները, որ իշխանությունը որևէ քայլ չի ձեռնարկել, բավարար ուշադրություն չի դարձրել Սևանի էկոհամակարգին, Սևանի հիմնախնդիրներին, իրականությանը չի համապատասխանում, 1.5 մ-ից ավելի տարբերություն կա: Այնպես չէ, որ այս 10 տարիների ընթացքում որևէ բան չենք արել ու այսօր եկել ենք Սևանի հաշվին գյուղացիների համար ոռոգում ենք անում»,- նշեց Էդուարդ Շարմազանովը:

Անդրադառնալով նախօրոք հանրային քննարկում անցկացնելուն, ԱԺ լսումներ իրականացնելուն,  ԱԺ փոխնախագահը դա  իրատեսական չի համարում, քանի որ նախ 5-րդ գումարման ԱԺ-ն ավարտում էր իր աշխատանքները, իշխանություններն ու ընդդիմությունը զբաղված էին նախընտրական պայքարով, իսկ 6-րդ գումարման ԱԺ իրավունքներն էլ նոր են մտել ուժի մեջ:

Էդուարդ Շարմազանովը նշեց նաև, որ եթե կարիք լինի, ապա բնական է՝ պետք է լսումներ անցկացնեն. «Սա այն հարցն է, որ պետք է քննարկել: Բացի այդ, պառլամենտն ունի վերահսկողական ֆունկցիա և սիրելի՛ կառավարություն, այո, ամեն Աստծո օր դուք պետք է գաք, հաշվետվություն տաք՝ իշխանությանն էլ, ընդդիմությանն էլ: Մեզ ընտրել են, որ ձեզ նաև վերահսկենք, այստեղ որևէ վիրավորական բան չկա»:

Միաժամանակ ԱԺ փոխնախագահն ասաց, որ եթե խորհրդարանը կողմ չքվեարկի օրենքի նախագծին, ապա 130 հազար գյուղացի կմնա առանց ջրի:

«Սա կատաստրոֆիկ իրավիճակ կարող է ստեղծել: Դուք պատկերացնո՞ւմ եք՝ մենք պետք է պարզ ճակատով այդ գյուղացիներին ասենք, որ գիտեք ինչ կա, որպեսզի Սևանի մակարդակը մի քանի սանտիմետր ավելի լիներ, մենք ձեզ ոռոգման ջուր չտվեցինք, որ դուք վարկեր ավելի շատ վերցնեք, ձեր երեխաների ուսման վարձը չկարողանաք վճարել, ձեր ծնողների հոգսերը չկարողանաք հոգալ: 40 հազար հեկտար հողը  չորանա՞»,- նշեց Էդուարդ Շարմազանովը՝ հավելելով, որ սա ճիշտ որոշում է:

Նրա խոսքերով՝ ընտրությունը վատի ու վատթարագույնի միջև չէ, սա անհրաժեշտ ընտրություն է.  «Այո, Սևանը մեր ազգային հարստությունն է, բայց Սևանը նաև նրա համար է, որ մենք մի կողմից հոգ տանենք Սևանի, էկոհամակարգի մասին, որ մակարդակը բարձրանա, բայց մյուս կողմից, եթե լինում է սակավաջրության տարի, մենք կարողանանք օգտագործել Սևանը՝ մեր քաղաքացիների պահանջները հոգալու համար»:

Եզրափակելով ելույթը Էդուարդ Շարմազանովը հորդորեց կողմ քվեարկել նախագծին՝ նշելով, որ սա օպերատիվ դրական լուծում է 130 հազար քաղաքացիների խնդիրների համար: