Ձեր վստահելի աղբյուրը

«Արդեն ուսումնասիրվել է Արփա-Սևան թունելի շինարարության երկրորդ փուլը, որը, ամենայն հավանականությամբ, լինելու է վերջնական»,- Ազգային ժողովի արտահերթ նիստում  «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» ՀՀ օրենքում լրացումներ կատարելու մասին» օրենսդրական նախագծի քննարկմանն ասաց հիմնական զեկուցող ՀՀ էներգետիկ ենթակառուցվածքների և բնական պաշարների նախարարության ջրային տնտեսության պետական կոմիտեի նախագահ Արսեն Հարությունյանը՝ պատասխանելով ՀՀԿ խմբակցության անդամ Շուշան Սարդարյանի հարցին, թե ի՞նչ ընթացքում են թունելի շինարարության աշխատանքները:

Ա. Հարությունյանը տեղեկացրեց, որ դեռևս 2010թ. հաշվարկներ են եղել,  համաձայն որոնց Արփա-Սևան թունելի ամբողջական վերականգնման համար անհրաժեշտ է 27 միլիարդ դրամ, որից առանձնացվել էր առաջին անհրաժեշտության խնդիրները, գումարը կազմել էր 12,5 միլիարդ դրամ, մրցույթր էր հայտարարվել:

«Հաղթողը 11 միլիարդ  դրամով պետք է իրականացներ աշխատանքներ 2011-2017 թվականի  մինչև հունիս-հուլիս: Շինարարությունն ավարտվել է 2016 թվականի հոկտեմբերին»,- ասաց Ջրային տնտեսության պետական կոմիտեի նախագահը:

Ա. Հարությունյանի խոսքով, երկրորդ փուլն ավարտելու համար 5 միլիարդ դրամ հավելյալ գումար  է անհրաժեշտ:

«Շինարարությունն արդեն սկսվել է, 3 տարի է տևելու, որից հետո Արփա-Սևան թունելի միջոցով հավելյալ բաց կթողնվի 250 միլիոն խ/մ ջուր»,- ասաց նա:

Շ. Սարդարյանի հաջորդ հարցը վերաբերվում էր ջրամբարներին. «Խոսեցիք սակավաջրության, ջրամբարների թերլցվածության մասին: Մյուս կողմից նախաձեռնում եք նոր ջրամբարների կառուցում: Ի՞նչ կանխատեսումներ կան նոր կառուցվող  ջրամբարները լցնելու հետ կապված»:
Ա. Հարությունյանն ասաց, որ այսօր շինարարություն է ընթանում Վեդու ջրամբարում, կան նաև նախագծվող ջրամբարներ:

«Այսօր ունենք ևս մեկ այլ ծրագիր, նախատեսում ենք փոքր ջրամբարների շինարարություն լոկալ տեղերում, որպեսզի կարողանանք լոկալ հարցերը կարգավորել»,- նշեց նա:

ՋՏՊԿ-ի նախագահը տեղեկացրեց, որ Վեդու 29 միլիոն խ/մ ծավալով ջրամբարի շինարարարության ավարտը նախատեսված է 4 տարուց:

«Ջրամբարի շինարարության ավարտից  հետո Սևանա լճի բեռը հնարավոր կլինի թեթևացնել մինչև 18 միլիոն խ/մ-ի չափով»,- ասաց Ա. Հարությունյանը: