Ձեր վստահելի աղբյուրը

«2016 թվականի սցենարով աշխատելով՝ Սևանա լճից լրացուցիչ ջրառ  չիրականացնելու դեպքում համակարգում առկա են մնում միայն չլուծված խնդիրներ՝ Սևան-Հրազդան համակարգում 50 միլիոն մ³ ջրի դիֆիցիտ, Արաքս-Ախուրյան համակարգում՝ 105 միլիոն մ³ ջրի դիֆիցիտ»,- Ազգային ժողովի արտահերթ նիստում  «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» ՀՀ օրենքում լրացումներ կատարելու մասին» օրենսդրական նախագծի քննարկմանն ասաց հիմնական զեկուցող  ՀՀ էներգետիկ ենթակառուցվածքների և բնական պաշարների նախարարության ջրային տնտեսության պետական կոմիտեի նախագահ Արսեն Հարությունյանը:

Նշենք, որ նախագծով առաջարկվում է սահմանված ոռոգման նպատակով Սևանա լճից տարեկան բացթողման 170 մլն մ ³ չափաքանակի ավելացում՝ դարձնելով այն մինչև 270 մլն մ ³ :

«Սևանա լճից ջրի բաց թողման տարեկան առավելագույն չափաքանակի փոփոխության վերաբերյալ ժամանակավոր ծրագիրն ուղղված է սոսկ գյուղատնտեսական խնդիրների  լուծմանը և կոչված է բավարարելու համակարգի առջև ծառացած առկա խնդիրները»,- հայտարարեց Արսեն Հարությունյանը:

Նա տեղեկացրեց, որ Սևան-Հրազդան  ջրառի իշխման տարածքում այս տարի նախորդ տարվա համեմատ Ապարանի և Ազատի ջրամբարներում ոռոգման  ջրաքանակը պակաս է 17 միլիոն  մ^3- –ով, Հրազդան գետի ջրատվությունը՝ 40 միլիոն մ³ –ով: 2016-ին եղել է 150 միլիոն մ³ , 2017 թվականի նույն ժամանակահատվածում՝ 110 միլիոն մ³: 2016 թվականին ևս 60 միլիոն մ³  ջուր արտադրվել է Մխչյանի, Ռանչպարի պոմպակայանների միջոցով, ծախսը կազմում է 1,2-1,3 միլիրադ դրամ:

«Այսպիսով՝ Սևան-Հրազդան համակարգում առկա է 117 միլիոն մ³   ջրի դիֆիցիտ անցած տարվա նկատմամբ: Նախորդ տարվա  սցենարով ջրամատակարարում իրականացնելու դեպքում Մխչյանի, Ռանչպարի պոմպակայանները կարող են լրացնել այս դիֆիցիտի շուրջ 50 տոկոսը միայն: Այդ իսկ պատճառով Սևանից լրացուցիչ ջրառը դառնում է  անհրաժեշտություն»,- նշեց հիմնական զեկուցողը:

Նրա խոսքով, խնդիրն առավել սուր բնույթ է ստանում, երբ Սևան-Հրազդան համակարգի կարիքներին  գումարվում է նաև Արաքս-Ախուրյան համակարգի խնդիրները:

«2016 թվականի համեմատ, Ախուրյանի  ջրամբարի առավելագույն լցվածությունը 105 միլիոն մ³-ով պակաս է. 2016-ին եղել է 545 միլիոն մ³, այս տարի  առավելագույն լցվածությունը՝ 440 միլիոն մ³: 
Ախուրյան-Արաքս համակարգի իշխման տակ գտնվող հողատարածքների ջրապակասի լրացման միակ տարբերակը մեխանիկական ջրարտադրությունն է Արմավիրի տարածքի խորաքային հորերի շահագործման միջոցով, ինչը կպահանջի առնվազն 1,2-1,3 միլիարդ դրամ հավելյալ ծախս:

Արդյունքում երկու համակարգում էլ ունենք թերոռոգում, որը  կարող է հանգեցել անկառավարելի ռիսկերի գյուղատնտեսական արտադրանքների վերջնարդյունքի կորստի՝ առոչինչ դարձնելով նաև մինչ այդ իրականացված ջրամատակարարումը, ինչպես նաև շուրջ 130 հազար  հողօգտագործողների կողմից կատարված ծախսերն ու մուծումները»,- ասաց Ա. Հարությունյանը: