Ձեր վստահելի աղբյուրը

Երևանի Շենգավիթ վարչական շրջանի ընդհանուր իրավասության դատարանում Ժիրայր Սեֆիլյանի, Գևորգ Սաֆարյանի և մյուսների գործով դատական նիստին նախագահող դատավոր Տաթևիկ Գրիգորյանը Ժիրայր Սեֆիլյանին առաջարկեց այլ պաշտպան ընտրել, իսկ հրաժարվելու դեպքում  դատարանն իր նախաձեռնությամբ այլ պաշտպանի կներգրավվի: Դատավորն ասաց, որ Սեֆիլյանի պաշտպաններից Տիգրան Հայրապետյանն արդեն 3-րդ նիստն է անընդմեջ չի մասնակցում դատական նիստին, ներկայացրեց Քրեական դատավարության 304-րդ հոդվածի (Պաշտպանի մասնակցությունը դատական քննությանը և նրա չներկայանալու հետևանքները)  2-րդ կետը: 

Ժիրայր Սեֆիլյանը հայտարարեց. «Ես իմ պաշտպաններից չեմ հրաժարվում:  Նորից եմ պնդում, որ իմ բացակայությամբ նրանք դատական նիստին մասնակցելու իրավունք չունեն: Իսկ ձեր պաշտպաններին պահեք ձեզ: Տիգրան Հայրապետյանը մնում է իմ պաշտպանը»:

Դատավորը հայտարարեց, որ մեկ ժամ է տալիս ամբաստանյալին՝ ներկայացնելու հստակ դիրքորոշում:

«Կարող եք մեկ րոպե տրամադրել: Իմ դիրքորոշումը հստակ է, իմ պաշտպանությունն իրականացնելու է Տիգրան Հայրապետյանը»,- ասաց Ժ. Սեֆիլյանը:

Ամբաստանյալ Գևորգ Սաֆարյանը նույնպես հայտարարեց, որ իր պաշտպանը լինելու է միայն Տիգրան Եգորյանը: Դատավորը հայտարարեց, որ նա արդեն 4-րդ նիստն է չի ներկայանում, հետևաբար առաջարկում են այլ պաշտպան ընտրել, իսկ հրաժարվելու դեպքում  դատարանն իր նախաձեռնությամբ այլ պաշտպանի կներգրավվի:

«Լիազորում եմ միայն Տիգրան Եգորյանին: Չեմ լիազորում Տիգրան Եգորյանին իմ բացակայության ժամանակ իմ անունից հանդես գալ: Պաշտպան Եգորյանը չի ներկայանում իմ պահանջով»,- ասաց Գ. Սաֆարյանը:

Ամբաստանյալ Ներսես Պողոսյանը չհրաժարվեց իր փաստաբաններ Արայիկ Պապիկյանից և Նինա Կարապետյանցից:

«Արայիկ Պապիկյանը երեք նիստի չի մասնակցում»,- հայտարարեց դատավորը՝ ապա հայտարարեց մեկ ժամ ընդմիջում՝  մյուս պաշտպանի՝ Նինա Կարապետյանցին դատարան ներկայանալու համար:

Հիշեցնենք, որ նախորդ նիստին դատարանը 10 ժամով դատական նիստերի դահլիճից հեռացրել էր Ժիրայր Սեֆիլյանը, Գևորգ Սաֆարյանին,  Ներսես Պողոսյանը: Նրանց բերում էին դատական նիստերի դահլիճ մի քանի րոպեով՝ պաշտպանների ներգրավվելու հարցի համար: