Ձեր վստահելի աղբյուրը

Երևանի Շենգավիթ վարչական շրջանի ընդհանուր իրավասության դատարանում շարունակվում է Ժիրայր Սեֆիլյանի, Հրայր Թոփչյանի, Սասունիկ Կիրակոսյանի, Հովհաննես Պետրոսյանի, Գալուստ Գրիգորյանի, Ներսես Պողոսյանի, Գևորգ Սաֆարյանի գործով դատական նիստը:

Նշենք, որ յոթ մեղադրյալից  հինգը դեռևս նախորդ նիստից 10 ժամով  հեռացված էին դատական նիստերի դահլիճից:

Նախագահող դատավոր Տաթևիկ Գրիգորյանը հայտարարեց, որ գործին ներգրավվել է նոր մեղադրող: Հարցին, թե արդյո՞ք պաշտպանական կողմն ունի բացարկի միջնորդություն մեղադրողի դեմ, ամբաստանյալ Ներսես Պողոսյանի փաստաբան Արայիկ Պապիկյանն ասաց, որ այս հարցին կարող են պատասխանել պաշտպանյալի հետ խորհրդակցելուց հետ:

Այսօրվա դատական նիստին ներկա չէին պաշտպաններ Տիգրան Հայրապետյանն ու Տիգրան Եգորյանը: Դատավորն ասաց, որ Տիգրան Եգորյանը գրություն էր ուղարկել դատարան՝ հայտնելով, որ վատառողջ է,  խնդրել էր իր բացակայությունը հարգելի համարել:

Նա նաև իր գրության մեջ նշել էր. «Պաշտպանյալիս  դատական նիստերից հեռացված լինելու  պարագայում անհնարին, անօգուտ եմ համարում  իմ՝ որպես պաշտպանի մասնակցությունը դատական նիստին և որ ամենակարևորն է՝ պաշտպանյալիս շահերին և  հանձնարարությանը հակասող: Նաև միջնորդում եմ վերականգնել սույն գործով պաշտպանյալիս մասնակցությունը դատական նիստին»:

Դատավոր Տաթևիկ Գրիգորյանը հայտարարեց, որ Ժ. Սեֆիլյանի պաշտպան Տիգրան Հայրապետյանը ներկա չէ նիստին, տեղեկություններ առկա չեն պատճառի մասին, դատարանը հեռանում է խորհրդակցական սենյակ դրսևորված վարքագծին  գնահատական տալու: 30 րոպե ընդմիջումից հետո վերադարձավ և հայտարարեց, որ նրա նկատմամբ կիրառվում է դատական սանկցիա: 

Ընդմիջումից հետո դատարանը խորհրդակացական սենյակ գնաց նաև փաստաբան Արայիկ Պապիկյանի վարքագծի վերաբերյալ որոշում կայացնելու: Փաստաբանը մի քանի անգամ փորձում էր բացատրություն ստանալ դատարանից իր պաշտպանյալի վերաբերյալ: Նա նաև նշեց, որ իր պաշտպանյալը չի լիազորել իրեն առանց իր ներկայության մասնակցելու դատական նիստերին: Նա դատավարության ժամանակ հեռացավ դահլիճից: 

Ըստ մեղադրականի՝ զանգվածային անկարգություններ կազմակերպելու նախապատրաստության, կազմակերպված խմբի կողմից ապօրինի կերպով հրազեն, ռազմամթերք ձեռք բերելու, պահելու, փոխադրելու և շենքեր, շինություններ զավթելու նախապատրաստության համար Ժիրայր Սեֆիլյանին մեղադրանք է առաջադրվել ՀՀ քրեական օրենսգրքի 35-225-րդ հոդվածի 1-ին մասով, 235-րդ հոդվածի 3-րդ մասով, 35-219-րդ հոդվածի 3-րդ մասի 1-ին կետով, զանգվածային անկարգություններ կազմակերպելու նախապատրաստության համար Գևորգ Սաֆարյանին մեղադրանք է առաջադրվել ՀՀ քրեական օրենսգրքի 35-225-րդ հոդվածի 1-ին մասով, կազմակերպված խմբի կողմից ապօրինի կերպով հրազեն, ռազմամթերք ձեռք բերելու, պահելու, փոխադրելու համար Հրայր Թոփչյանին, Սասունիկ Կիրակոսյանին, Հովհաննես Պետրոսյանին, Գալուստ Գրիգորյանին և Ներսես Պողոսյանին մեղադրանքներ են ռաջադրվել ՀՀ քրեական օրենսգրքի 235-րդ հոդվածի 3-րդ մասով: