Ձեր վստահելի աղբյուրը

Բասկետբոլի տղամարդկանց Հայաստանի ազգային հավաքականի գլխավոր մարզիչ Նիկշա Բավցևիչը մի քանի օր է Երևանում է: Նոր մարզչի գլխավորւթյամբ ազգային թիմը շուտով կսկսի պատրաստվել աշխարհի առաջնության ընտրական փուլին: Հայաստանի հավաքականի առաջիկա մրցակիցներն են` Բոսնիա և Հերցեգովինան, Շվեդիան և Սլովակիան:

Նիկշա Բավցևիչը ՀԱՕԿ լրատվականի հետ հարցազրույցում խոսել է իր առաջին տպավորությունների և աշխարհի առաջնությունում մեր շանսերի մասին:

- Պարո´ն Բավցևիչ, բարի գալուստ Հայաստան: Ինչպիսի՞ տպավորություններ ունեք մեր երկրից:

- Առաջին անգամ եմ Հայաստանում: Հասցրել եմ մի փոքր ծանոթանալ քաղաքին: Հայաստանի մասին ունեցածս տեղեկությունը համացանցից է: Ես գիտեմ, որ շատ հին երկիր է` հայրենասեր մարդկանցով, ինչը շատ լավ է: Մարդիկ շփվող են, ընկերասեր և օգնելու պատրաստակամ: Ես հաճելիորեն զարմացա, երբ իմացա, որ ուտելը ձեզ մոտ ազգային հոբի է: Դա շատ համեղ հոբի է (ծիծաղում է,- խմբ):

Երևանը հակասություներով լի քաղաք է: Կարծես, այստեղ հին ավանդույթների և ժամանակակից կյանքի պայքար լինի: ևս մեկ առանձնահատկություն եմ նկատել. շատ եմ ճամփորդել, բայց երբեք ոչ մի քաղաքում այդքան վարդեր չեմ տեսել: Ինձ գրավել են նաև որմնանախշերը: Հայաստանն առաջին քրիստոնեական երկիրն է, հետևաբար՝ այստեղ ուսումնասիրելու բազմաթիվ վայրեր կան:

- Ինչո՞ւ որոշեցիք գլխավորել Հայաստանի հավաքականը:

- Իմ գործակալ Սևակ Կևուչյանը հայ է և նա է ինձ ասել այս շանսի մասին: Ինձ համար նոր մարտահրավեր էր գլխավորել ազգային հավաքական: Հետո, հայրս աշխարհագրագետ է, նա ինձ պատմել էր Հայաստանի պատմության, ցեղասպանության մասին, ինչը խթանեց, որ ես ընդունեմ առաջարկը: Ցանկացած մարզչի համար պատիվ է գլխավորել ազգային հավաքական:
Հայաստանի բասկետբոլի ֆեդերացիան ցանկանում է այս մարզաձևը վերադարձնել եվրոպական նախկին մակարդակին: Վերջին երեք ամիսների ընթացքում ամեն օր կապի մեջ եմ եղել ֆեդերացիայի ներկայացուցիչների հետ: Նրանք մեծ խանդավառությամբ են վերաբերում բասկետբոլը զարգացնելու գործին:

Մ 20 տարեկանների հավաքականը մեծ ներուժ ունի: Հաճելիորեն զարմացա, երբ տեսա խաղացողների, որոնք կարող են խաղալ եվրոպական մակարդակով: Ֆեդերացիան անհավատալի էներգիա և գումար է ներդնում, որոնք փոխկապակցված են:
Դուք ունեք կանանց և տղամարդկանց տարիքային հավաքականներ: Ինձ ասացին, որ սա զարգացման և ուժեղ թիմ ունենալու առաջին քայլն է: Առաջիկայում ֆեդերացիան պատրաստվում է նաև ներքին առաջնություն ստեղծել: Ինձ համար մեծ հաճույք է լինել այս ամենի մասնիկը:

- Արդեն ծանոթացե՞լ եք բասկետբոլիստների հետ:

- Շատերի հետ խոսել եմ հեռախոսով, ներկայացրել եմ ինձ և իմ ծրագրերը: Այժմ սպասում եմ, որ նրանք ժամանեն Հայաստան:

- Հետևե՞լ եք մեր մրցակիցների խաղերին: Ի՞նչ կասեք նրանց մասին:

- Շատ բարդ խմբում ենք հայտնվել: Հայաստանի հավաքականը նախորդ տարի դարձել է փոքր երկրների Եվրոպայի առաջնության չեմպիոն. այժմ շատ ավելի բարդ առաջնությունում ենք խաղալու, լուրջ մրցակիցներ ունենք: Չենք կարող Մալթային համեմատել Բոսնիա և Հերցեգովինայի կամ Շվեդիայի հետ: Նրանք միջազգային մակարդակի շատ բասկետբոլիստներ ունեն: Մեր մրցակիցները մեզնից մի փոքր ուժեղ են: Սա մեր թիմի ու ֆեդերացիայի համար լավ հնարավորություն է` սովորելու, տեսնելու, թե ինչ աշխատանք է անհրաժեշտ, ինչպիսին է մեր ապագան:

Առավել մանրամասն՝ սկզբնաղբյուր կայքում