Ձեր վստահելի աղբյուրը

«Ցածր քաշով նորածինների խնամքի ծառայությունների որակի բարելավման ուղղությամբ ինչպես ամբողջ աշխարհում, այնպես էլ մեզ մոտ անելիքներ դեռ շատ կան»,- այսօր Երևանում մեկնարկած «Ցածր քաշով նորածինների խնամքի բարելավում» թեմայով եռօրյա միջազգային համաժողովի բացումից առաջ լրագրողների հետ զրույցում ասաց ՀՀ առողջապահության փոխնախարար Սերգեյ Խաչատրյանը։

Նշենք, համաժողովը Երևանում է հավաքել նեոնատալ մասնագետների Հայաստանից, Իտալիայից, Ուզբեկստանից, Վրաստանից՝ քննարկելու ցածր քաշով նորածինների խնամքի կարիքներին անդրադառնալու ապացուցողական բժշկության վրա հիմնված մոտեցումները, ինչպես նաև նոենատալ տեխնոլոգիայի, հետազոտություների և բուժման ռազմավարության բնագավառներում առկա առաջխաղացումները։

Առողջապահության փոխնախարարը նշեց, որ Հայաստանում այս ուղղությամբ առաջին հերթին իրականացվել են մասնագիտական կարողությունների բարելավման աշխատանքներ. «Կարևոր է նման նորածինների հետ աշխատող թիմերի համագործակցված աշխատանքը, տարբեր բուժհաստատությունների համագործակցումը։ Եթե համեմատելու լինենք 90-ականների հետ, մենք 45 տոկոսով 0-5 տարեկանների մահացությունն իջեցրել ենք, իսկ դրա զգալի մասը հենց այդ երեխաների հաշվին է։ Բայց դեռ անելիքներ շատ ունենք։  Գիտությունն անընդհատ զարգանում է, նոր տեխնոլոգիաներ են ի հատ գալիս, որոնց ձեռք բերման համար մեծ գումարներ են անհրաժեշտ։ Մեծ գումարների հնարավորություն այսօր չունենք, բայց ունենք լավ համագործակցություն ԱՄՆ Միջազգային զարգացման գործակալության, ՅՈւՆԻՍԵՖ-ի հետ և փորձում ենք այդ ճանապարհով մեր մասնագիտական կարողությունների զարգացում իրականացնել։ Մենք կանգ չենք առնում»։

Ինչ վերաբերում է վերջերս Հայաստանում ծնված հնգյակին և թե ինչն էր մեր երկրում պակասում նորածիններից երեքի կյանքը փրկելուն՝ Սերգեյ Խաչատրյանն ասաց. «Երբ նրանք ծնվեցին, նախարարությունը տեղեկացրեց, որ երեխաներից երեքը ծայրագույն ծանր վիճակում են, սակայն ոգևորությունն այնքան մեծ էր, որ շատերը դրան ուշադրություն չդարձրեցին, հետո սկսեցին ասել, մեր երկրում չկարողացան փրկել։ Սակայն նույնիսկ ամենազարգացած երկրներում նման քաշով երեխաների կյանքը վտանգված է, անկախ նրանից ունենք նորագույն տեխնոլոգիաներ, թե ոչ, նրանց կյանքի ապրելու հնարավորությունը նշանակալի ցածր էր»։

Լրագրողների հետ զրույցում Մուրացան համալսարանական հիվանդանոցի վերակենդանացման կլինիկայի ղեկավար Հրանտ Կալենտերյանը նշեց, որ սա աշխարհի ամենաթանկ բժշկությունն է. 350-800 գրամանոց մի երեխայի խնամքը կարող է արժենալ 80-500 հազար դոլար։

«Այս միջոցառումը նպատալ ունի ներկայացնել և քննարկել անհաս և ցածր քաշով նորածինների խնամքի և բուժման նոր մոտեցումները, ինչպես նաև հայաստանյան և միջազգային փորձը»,- հավելեց նա։