Ձեր վստահելի աղբյուրը

«Դատախազության համակարգում կոռուպցիոն երևույթների ռիսկայնությունը զրոյացված է: Ես վստահորեն եմ դրա մասին հայտարարում»,- Ազգային ժողովի արտահերթ նիստում «Հայաստանի Հանրապետության դատախազության 2016 թվականի գործունեության մասին» հաղորդումը ներկայացնելիս ասաց ՀՀ գլխավոր դատախազ Արթուր Դավթյանը:

Դատաիրավական համակարգում կոռուպցիոն ռիսկերի վերաբերյալ հարցը գլխավոր դատախազին ուղղեց «Ծառուկյան» խմբակցության անդամ Նաիրա Զոհրաբյանը: Նա մասնավորապես հարցրեց. «Ձեր ներկայացրած հաղորդման համաձայն, 2007-ին արձանագրվել է կոռուպցիայի 7 դեպք, 2016-ին՝ 76: Հասկանալի է, որ հաստատված վիճակագրությունն իրական պատկերից բացարձակապես հեռու է: Ինձ հետաքրքրում է կոռուպցիան ձեր համակարգում: Երբ մենք, նաև Եվրամիության հորդորով  բարձրացրեցինք դատավորների, դատախազների աշխատավարձը, թոշակը,  հիմնական մոտիվացիան այն էր, որ համակարգում կոռուպցիան նվազի: Ունեք վիճակագրություն, թե համակարգում կոռուպցիան նվազե՞լ է, թե՞ ոչ, որովհետև որպես պատգամավոր ստանում եմ նամակները, որոնց գերակշիռ մեծամասնությունը վերաբերում է դատարաններում կոռուպցիոն երևույթներին»:

Արթուր Դավթյանը նշեց, որ որևէ մեկը, նաև ինքը, չեն կարող երաշխավորել, որ 337 դատախազներից որևէ մեկը որևէ մի օր կարող է ներգրավվել  դրա մեջ:

«Ես մի բան խոստանում եմ բոլորիդ, խոստացել եմ  նաև իմ գործընկերներին, եթե որևէ մեկի հետ այդ հանգամանքը կբացահայտվի, օրենքի խստագույն պատասխանատվությանը նա կենթարկվի: Սա հստակորեն ներկայացնում եմ»:

Նաիրա Զոհրաբյանն արձագանքեց. «Ես ձեր փոխարեն այդպես միանշանակ չէի հայտարարի, որ ձեր համակարգում կոռուպցիան զրոյացված է»:

Գլխավոր դատախազն ասաց.  «Ես ասացի, որ զրոյացվել է դրա ռիսկերը»:

Պատգամավորը նաև կալանքը որպես խափանման միջոց կիրառելուն անդրադարձավ՝ նշելով, որ Եվրոպական դատարանում գործերի շքերթ է, որոնք վերաբերում են հենց կալանքն անհարկի կերպով, անկապ, անիմաստ տեղը որպես խափանման միջոց կիրառելուն, այս խնդիրը պետք է լրջագույնս վերանայվի:

«Չե՞ք կարծում, որ այս համակարգում պետք է փոփոխություն անենք, որ անարդար վճիռ կայացրած, կալանքն անհարկի կերպով խափանման միջոց ընտրած դատավորներն իրենք իրենց անձնական միջոցներից փոխանցեն, ոչ թե իրենց անարդար կամ կոռուպցիոն սկանդալների արդյունքում կայացված վճիռների բեռի պատասխանատվությունը դնեն հարկատուների վրա»,- հարցրեց Նաիրա Զոհրաբյանը:

Արթուր Դավթյանն ասաց, որ կալանավորման խնդրին ինքնանպատակ չեն մոտենում, յուրաքանչյուր կոնկրետ դեպքում քննարկում են կալանքի կիրառման հիմքերը, դա բացառապես պայմանավորվում է մեղադրյալի պատշաճ վարքագծի ապահովման անհրաժեշտությամբ:

«Եթե ունեք բազմաթիվ օրինակներ, անձամբ պատրաստ եմ ձեզ հետ քննարկելու ցանկացած այդպիսի իրավիճակ համապատասխան հիմքերին անդրադառնալու տեսանկյունից»,- նշեց նա:

Ինչ վերաբերում Եվրոպական դատարանի որոշման առիթով դատավորներին համապատասխան նյութական պատասխանատվության ենթարկելուն, գլխավոր դատախազն ասաց. «Կարծում եմ՝ շատ ավելի խորը, երկար ուսումնասիրության  առարկա է դատավորի անկախության երաշխիքների, մնացյալ այլ իրավական ինստիտուտների տեսանկյունից»: