Ձեր վստահելի աղբյուրը

«Սա տեղեկատվական պատերազմ է՝ իր բոլոր դրսևորումներով, սակայն մեր երկրում չի մշակվել մի կոնկրետ հայեցակարգ և քաղաքականություն՝ դիմակայելու դրան: Որքան էլ ասեն, որ ապրիլից հետո կառավարման համակարգում փոփոխություններ են կատարվել, ամենևին էլ այդպես չէ»,-այսօր կայացած մամուլի ասուլիսի ժամանակ այս մասին ասաց «Ընդդեմ իրավական կամայականությունների» ՀԿ գործադիր տնօրեն, արցախյան հարցով փորձագետ , ՀՀ մարդու իրավունքների նախկին պաշտպան Լարիսա Ալավերդյանը՝ անդրադառնալով ադրբեջանական կողմի՝ սահմանային վիճակի  մասին պարբերաբար ապատեղեկատվություն տարածելու պրակտիկային։

«Սկզբում ադրբեջանցիները սպանված երեխայի այլ լուսանկար տարածեցին, հետո՝ բոլորովին այլ: Սա սադրանք է և պատրաստված սցենար: Իսկ ապա անցած տարվա ապրիլին՝ Ներքին Ճարտար գյուղում ադրբեջանցիները թիրախավորված կրակեցին դպրոցի վրա՝  նպատակ ունենալով մեծ թվով հայ երեխաների սպանել: Միայն երջանիկ պատահականությամբ նման ողբերգություն տեղի չի ունեցել»,- ասց Լարիսա Ալավերդյանը:

Բանախոսն ընդգծեց՝ Արցախի Հանրապետությունը գործում է համաչափ՝ հիանալի կերպով դիմագրավելով ադրբեջանական սադրանքներին: Իսկ ահա Հայաստանը պետք է առավել ակտիվ աշխատի ԵԱՀԿ Մինսկի խմբի համանախագահների հետ և խաղաղություն պարտադրի Ադրբեջանին: Բացի այդ՝ հայկական կողմը պետք է դիմի ՄԱԿ-ի մարդու իրավունքների հանձնաժողով և միջազգային այլ իրավապահ մարմիններ՝ բարձրացնելով սահմանամերձ հայ ազգաբնակրության կյանքի իրավունքի հարցը, որը փաստացի խախտում է Ադրբեջանը՝ սահմանամերձ բնակավայրերին շատ մոտ զինտեխնիկա կենտրոնացնելով:

«Քաղաքական հարթակները մեր կողմից պատշաճ գնահատված չենք: Այստեղ քիչ գործ է արվում: Հայաստանը մինչ օրս չի կարողացել սեղանին դնել մի փաթեթ, որը կչեզոքացնի Ադրբեջանի ագրեսիվ հռետորաբանությունը»,- նշեց Լարիսա Ալավերդյանը:

Հարցին՝ ինչ պետք է ակնկալել երկու օրից կայանալիք Նալբանդյան-Մամեդյարով հանդպումը, բանախոսը պատասխանեց՝ ինքը մինչև անգամ դժվարանում է ողջունել այդ հանդիպումը, քանի որ որևէ սպասում դրանից չունի: