Ձեր վստահելի աղբյուրը

Նախկին գլխավոր դատախազ, այժմ պատգամավոր Գևորգ Կոստանյանն այսօր ԱԺ-ում լրագրողների հետ զրույցում համոզմունք հայտնեց, որ ապահովել է արդյունավետ քննության անհրաժեշտ պայմանները. «Մարտի մեկի գործով, եթե հիշում եք, բոլոր գործերը քննվում էին մեկ ամբողջական գործի շրջանակում: Իսկ դա որպես կանոն առաջացնում է քննության անարդյունավետություն: Հետո իմ հանձնարարությամբ, առավել արդյունավետ ու առարկայական քննություն իրականացնելու համար տասը զոհերից յուրաքանչյուրի գործն առանձնացվեց»:

Նրա խոսքով, դա հնարավորություն կտա, որ յուրաքանչյուր գործ ունենա առանձին քննիչ, ինչի արդյունքում էլ քննիչներն առավել կկենտրոնանան։

«Դա նաև հնարավորություն կտա, որ տուժողների իրավահաջորդները, տուժողները, իրավապաշտպանները առավել լավ պատկերացնեն, թե գործը ինչ փուլում է, ինչ հետևանքներ կան, և ամենակարևորը, յուրաքանչյուր քննիչի գործողություն,  որոշում, որը գտնում են ոչ հիմնավոր, արդյունավետ, առավել ևս ապօրինի, կարող են բողոքարկել:

Այսինքն քննության արդյունավետությանն ուղղված ոլոր ուղղությունները, իմ խորին համոզմամբ, ես ապահովել եմ: Հետագա քննության մասին, կարծում եմ, Արթուրը Դավթյան ավելի մանրամասն կներկայացնի, իմ իրավասությունից դուրս հարց է»,-ասաց Կոստանյանը: