«Ոսկե ծիրան»-ը կինոտոն լինելուց բացի, կարևոր առաքելություն է ստանձնել. Ռալֆ Յիրիկյան

Մշակույթ 12:15 10/07/2017 Հայաստան

«Մենք երկար ճանապարհ ենք անցել «Ոսկե ծիրանի» հետ և կարող եմ ասել, որ կինոտոն լինելուց բացի, այս փառատոնը կարևոր առաքելություն է ստանձնել»,-նախօրեին Մոսկվա կինոթատրոնում «Ոսկե ծիրան» Երևանի 14-րդ կինոփառատոնի բացմանն ասել է փառատոնի գլխավոր գործընկեր ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:

ՎիվաՍել-ՄՏՍ-ի լրատվական ծառայության հաղորդմամբ, նա նշել է, որ արդեն տասնչորս տարի փառատոնը փորձում է արվեստի ամենազոր ուժով արթուն պահել մարդու միտքն ու լուսավոր մտածելու ունակությունը, մարդկությանը դարձնել քաղաքակիրթ արժեհամակարգի հետևորդ:

«Կինոն ազդեցիկ միջոց է միմյանց ճանաչելու, հասկանալու և հարգելու համար: Ողջունում եմ փառատոնի մասնակիցներին, հյուրերին և կինոսեր հասարակությանը՝ մաղթելով հաճելի դիտում և հաջողություն»,-ասել է Ռալֆ Յիրիկյանը:

Ծիրանօրհնեքի ավանդական արարողությամբ, ապա հայ անվանի կինոգործիչների շարքում արժանավորների անունը հավերժացնող նոր աստղերի բացմամբ՝ մեկնարկել է տարվա սպասված մշակութային իրադարձությունը՝ «Ոսկե ծիրան» Երևանի 14-րդ կինոփառատոնը: Համաշխարհային կինոարվեստի շունչն ուղիղ մեկ շաբաթ՝ հուլիսի 9-16-ը կթևածի մայրաքաղաքում:

«Ոսկե ծիրանի» այս տարվա պաշտոնական ազդագիրը ծիրան հիշեցնող և 14-րդ փառատոնը խորհրդանշող երկրաչափական մարմին է:

96 երկրից 1100 հայտ ստացած փառատոնը կարող է իրական կինոտոն դառնալ մրցույթային և արտամրցույթային տարբեր ծրագրերում ընդգրկված բազմաժանր ֆիլմերի ասելիքով և ինքնատիպությամբ: Հայաստանի կինոսեր հասարակության համար այս իրադարձությունը բացառիկ հնարավորություն է՝ հայկական և համաշխարհային կինեմատոգրաֆի գլուխգործոցներին հաղորդակցվելու համար:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: