Ձեր վստահելի աղբյուրը

«Կեղծ թվեր ներկայացնելով, մոնիպուլյացիաներով, մի շարք օրենքների խախտմամբ ընդունվեց Սևանից լրացուցիչ ջուր բաց թողնելու մասին օրենքը, որը վնաս կպատճառի լճին, որովհետև  լիճը բարդ էկոհամակարգ է»,- լրագրողների հետ հանդիպմանն ասաց «Հայաստանի անտառներ» հասարակական կազմակերպության տնօրեն, բնապահպան-իրավաբան Նազելի Վարդանյանը։

Հիշեցնենք, որ ԱԺ-ն հուլիսի 6-ին ընդունեց «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» Հայաստանի Հանրապետության օրենքում լրացումներ կատարելու մասին  օրենքի նախագիծը, որով առաջարկվում էր ոռոգման նպատակով Սևանա լճից տարեկան բացթողման 170 մլն խ/մ չափաքանակի ավելացում՝ դարձնելով այն մինչև 270 մլն խ/մ:

Ն. Վարդանյանի խոսքով, Սևանա լիճը կենդանի օրգանիզմ է, չեն կարող մարդիկ նստեն ու որոշեն՝ ինչքան ջուր բաց թողնեն. «Ջրավազան կամ ջրամաբար չէ, երբ ուզեն լցնեն, երբ ուզեն՝ բաց թողնեն»:

Բնապահպանն ասաց, որ եթե նույնիսկ մեկ սանտիմետրով փոխվում է Սևանա լճի ջրի  ջերմությունը, ողջ կենդանական աշխարհը կարող է գենետիկական մուտացիայի ենթարկվել:

«Լճում արդեն գենետիկական մուտացիայի ենթարկվող ձկնատեսակներ կան: Էնդեմիկ տեսակներ ունենք, որոնք  հատուկ պահպանության կարիք ունեն: Բացի դրանից, եթե Սևանա լճի մակարդակն իջնում է, սկսվում են ճահճացման պրոցեսներ,  որովհետև արևի ճառագայթները հասնում են հատակին: Այդ պրոցեսների դեմ պայքարելը շատ բարդ կլինի, նույնիսկ կարող է այնպիսի անդառնալի հետևանքներ լինեն, որ մենք ընդհանրապես կորցնենք Սևանը»,- նշեց բանախոսը:

Ն. Վարդանյանի խոսքով, Սևանա լիճ լցվում են տարբեր աղտոտված ջրեր:

«2016 թվականի բնապահպանության նախարարության մոնիտորինգի և տեղեկատվության ՊՈԱԿ-ի տվյալների համաձայն,  լճում մագնեզիումի քանակը 1,2 անգամ գերազացում է  սահմանային, թույլատրելի կոնցենտրացիան, նաև վանադիումի, սելենի,  պղնձի, քրոմի սահմանային նորմերն են գերազանցում, որովհետև  Սոթքի աղտոտված ջրերը, կենցաղային աղտոտված ջրերը թափում են Սևանա լիճ: Ինչքան իջեցնում են ջրի մակարդակը, այդքան այդ կոնցենտրացիաները խտանում են»,- ասաց բնապահպանը՝ հավելելով, որ եթե ջուրը մագնեզիում է պարունակում, այն էլ 1,2 երկու անգամ սահմանային կոնցենտրացիաները գերազանցող, ընդհանրապես ոռոգելի չէ այդ ջուրը, առաջացնում է  աղակալում, 2 տարի հետո գյուղացին հողից էլ է զրկվելու:

«Այս ծրագրից օգուտ են ստանալու Սևանի մերձակա տարածքներում կառուցված շինությունների սեփականատերերը, էլեկտրաէներգիա արտադրող կազմակերպությունները, ՋՕ-երը, որոնք գումարները մսխել են թե վատ կառավարման, թե յուրացման արդյունքում, հիմա Սևանի հաշվին ուզում են իրենց բացերը փակել»,- նշեց բնապահպան-իրավաբան Նազելի Վարդանյանը։