Ձեր վստահելի աղբյուրը

«Ելք» խմբակցության ղեկավար Նիկոլ Փաշինյանն այսօր ԱԺ-ում իր խոսքը վերնագրել էր «Քուանշ գլխավոր դատախազին»: Անտեղյակների համար նա բացատրեց.«Քուանշը տերմին է, որն օգտագործվում է բլոտ խաղում՝ դիմացինի ասածը կասկածի տակ դնելու համար: Այսօր չորս դրվագով քուանշ ունեմ հայտարարելու գլխավոր դատախազին»:

Փաշինյանի խոսքով, առաջին քուանշը վերաբերում է մարտի 1-ի մասին հայտարարությանը, երբ Արթուր Դավթյանը հայտարարել է՝ կատարվում են անհրաժեշտ գործողություններ՝ Մարտի 1-ի սպանությունների բացահայտման, դրանք կատարած անձանց մեղադրանքները հիմնավորելու համար ապացույցներ ձեռք բերելու համար: Ասաց՝ հերթապահ նախադասությունը հայտարարող արդեն երրորդ գլխավոր դատախազն է:

«Քուանշ, պարոն գլխավոր դատախազ: Դուք ուզում եք ասել, որ որևէ գործողությո՞ւն եք կատարում: Ցույց տվեք քննչական գործողության մասին մի ապացույց»,- ասաց Նիկոլ Փաշինյանը:

Նա մտահոգություն հայտնեց, որ Մարտի 1-ի բոլոր զոհերը, բացառությամբ զինվորական Տիգրան Աբգարյանի ու ոստիկան Համլետ Թադևոսյանի Քրեական գործում բնորոշված են զանգվածային անկարգությունների մասնակիցներ:

«Այսինքն, առանց դատ դատաստանի այդ մարդկանց հանել են հանցագործներ ու մեղսակիցներ, այսինքն` նեգատիվ ֆոն է ստեղծվում, որ էդ մարդիկ վատ արարքներ են կատարել ու պարզ է, որ ոստիկանությունը կարող էր նրանց սպանել»,-ասաց պատգամավորը:

Երկրորդ «քուանշը» վերաբերում է «Սասնա ծռերի» ու Ժիրայր Սեֆիլյանի և մյուսների գործով ամբաստանյալների՝ ընտանիքների անդամների ու հարազատների տեսակցելու արգելքին: Նիկոլ Փաշինյանը հիշեցրեց գլխավոր դատախազի խոսքերը, որ արգելքը սահմանվել է՝ նախաքննության շահերից ելնելով:

«Ձերբակալված ու կալանավորված անձանց մասին օրենքի 15 հոդվածն ասում է, որ տեսակցությունը տեղի է ունենում ձերբակալվածների կամ կալանավորվածների պահելու  վայրում` ծառայողների հսկողությամբ»,-ասաց Փաշինյանը:

Նա ընթերցեց օրենքի հիշյալ կետի շարունակությունը, երբ տեսակցությունը կարող է վաղաժամկետ դադարեցվել, եթե տեսակցող հարազատները ձերբակալվածին կամ կալանավորվածին արգելված առարկա կամ տեղեկություններ փոխանցելու փորձ է լինում:

«Սա հաշվեհարդար է, խոշտանգում»,-ասաց նա:

Փաշինյանի երրորդ «քուանշը» Անդրիաս Ղուկասյանի վերաբերյալ էր: Փաշինյանը հիշեցրեց, որ  խմբակցության անդամները միջնորդել էին Ղուկասյանի խափանման միջոցը փոխվեր անձնական երաշխավորությամբ:

Սակայն դատախազությունը չէր փոխել կալանքը, հայտարարելով, որ որևէ երաշխիք չկա, որ նա պատշաճ վարքագիծ կապահովի:

«Քուանշ, պարոն Դատախազ: Ես և մեր խմբակցության պատգամավոր Մանե Թանդիլյանը գնացել ենք, տեսել ենք Անդրիաս Ղուկասյանին, նկարագրել ենք իրավիճակը: Ասել ենք՝ անձնական երաշխավորությամբ կալանքից ազատեք: Սրանից հետո, ասում են՝ երաշխիք չկա: Թե Անդրիաս Ղուկասյանը պիտի ստանձնած լիներ, որ ՀՀԿ-ի համար իրանց քուչում ձայներ է ապահովելու, նոր ներում տայիք, ազատեիք կամ ախպոր ախպոր ախպորը ասեիք՝ ՀՀԿ-ի համար ձայն հավաքի, որ ազատ արձակենք Անդրիաս Ղուկասյանին: Որ 9 պատգամավորի ասածը երաշխիք չի, բա ո՞ւմ ասածն է երաշխիք: Ձեր ասածն էլ մեզ համար երաշխիք չի, ձեր ասածը ծերից ծեր սուտ է, ընդհանրապես ձեր համակարգի գոյությունը մեզ համար երաշխքիք չի, որ Հայաստանում օրենք ու օրինականություն է գործում»,- նշեց Փաշինյանը:

Փաշինյանի վերջին «քուանշը» վերաբերում էր Արթուր Սարգսյանին՝ «Հաց բերողին»:
«Մարուքյանի հետ նստել ենք Արթուր Դավթյանի սենյակում, ասել ենք՝ մարդը մա-հա-նալու է: Մենք ոչ բժիշկ էինք, ոչ մասնագետ էինք, դա հասկանալու համար պետք չէր ոչ բժիշկ, ոչ փորձագետ լինել: Հիմա դատախազն ասում է, թե դատախազության  կամ նախքաննության մարմնի գործողությունները չեն, որ հանգեցրել են Արթուր Սարգսյանի մահվան: Քուանշ, պարոն գլխավոր դատախազ»,-ասաց Փաշինյանը, նա հիշեցրեց, որ 2016-ի դեկտեմբերին, կալանքից Սարգսյանը ազատ է արձակվել միջգերատեսչական մարմնի որոշմամբ, սակայն դրանից  հետո կրկնակի փորձաքննություն է նշանակվել:

Փաշինյանը հետաքրքրվեց, եթե ազատում եք, ինչո՞ւ եք նորից փորձաքննություն նշանակել, ի՞նչ իրադարձությամբ էր պայմանավորված:

«Պարզ է՝ հաշվեհարդարի, որովհետև մեր ժամանակների հերոս էր դարձել: Էս մարդուն հետ բերեցին կալանքի տակ, տարել են ՔԿՀ, նա էլ հացադուլ է հայտարարել, բուժօգնություն են առաջարկել, մերժել է: ՔԿՀ աշխատողները ամենօրյա ռեժիմով զեկուցել են, որ էս մարդու կյանքին վտանգ է  սպառնում: Պարզվեց՝ հանձնաժողովի եզրակացությունը սխալ է: Պարոն գլխավոր դատախազ, միջգերատեսչական հանձնաժողովի անդամների դեմ քրեական գո՞րծ եք հարուցել, ուրեմն խաբե՞լ են, թե կալանքի հետ անհամատեղելի հիվանդություններ ունի, իսկ այդ անձանց դատապարտե՞լ եք: Ո՛չ, չեք արել, դուք կրկին կալանավորել եք Արթուր Սարգսյանին, իսկ երբ հասկացել եք, որ մահանում է, իբր մեր միջնորդության հիման վրա ազատել եք, որ ազատության մեջ մահանա, դուք էլ քրգործ հարուցեք, ամիսներով քննեք, մինչև մարդիկ մոռանան այս դեպքի մասին»,- ասաց Նիկոլ Փաշինյանը:

Նա խոսքն ավարտեց դատախազության համակարգում կոռուպցիոն ռիսկերի զրոյացման մասին դատախազի հայտարարության մասին արձագանքով:

«Այստեղ կներեք, չեմ կարող ասել քուանշ, պարոն գլխավոր դատախազ: Այստեղ պետք է ասեմ քյարփինջը կապույտ»,-ասաց նա: