Ձեր վստահելի աղբյուրը

ՌԴ Տամբովի մարզի N3 քրեակատարողական  հիմնարկում պատիժ կրող ՀՀ քաղաքացի  Հրաչյա Հարությունյանի՝ Հայաստանին արտահանձնելու հետ կապված ՌԴ դատարանի կողմից վճիռը կայացված է, ուժի մեջ է մտել: Լրագրողների հետ հանդիպմանն ասաց ՀՀ արդարադատության նախարաի տեղակալ Սուրեն Քրմոյանը:

Նրա խոսքով, տեղեկատվություն է հրապարակվել Հ. Հարությունյանին ներքին տեղափոխման մասով՝ ՌԴ տարածքով:

«Ռուսական կառույցների հետ ամեն ինչ անում ենք, որ սեղմ ժամկետում տեղափոխվի Հայաստան՝ պատիժն այստեղ կրելու համար»,- ասաց փոխնախարարը՝ միաժամանակ հավելելով, որ հստակ ժամկետներ չի կարող նշել, քանի որ ՌԴ իրավասու լիազորությունների շրջանակում է: 

Ս. Քրմոյանն ասաց, որ Հ. Հարությունյանի տեղափոխման գործընթացը սկսված է:

Հիշեցնենք, որ  Հրաչյա Հարությունյանը, որը  ազատազրկման է դատապարտվել  6 տարի 9 ամիս ժամկետով,  2013-ի հուլիսի 13-ին  ՌԴ Պոդոլսկի շրջանի  մերձակայքում  «կամազ» մակնիշի  բեռնատար  մեքենայով բախվել էր մարդատար ավտոբուսին, ինչի հետևանքով զոհվել էր 18 մարդ:  Հրաչյա Հարությունյանին մեղադրանք էր առաջադրվել ՌԴ քրեական օրենսգրքի 264 (երթևեկության կանոնների խախտում և տրանսպորտային միջոցների շահագործում) և 327 (փաստաթղթերի կեղծում, պատրաստում և իրացում) հոդվածներով: