Ձեր վստահելի աղբյուրը

Ավան և Նոր Նորք վարչական շրջանների ընդհանուր իրավասության դատարանում շարունակվող «Սասնա ծռերի» 14 անդամների դատավարությանն ամբաստանյալ Արայիկ Խանդոյանը ներկա չէ: Փաստաբաններ Արա Ղարագյոզյանն ու Լուսինե Սահակյանը մտավախություն հայտնեցին, որ նրան կրկին կարող են խոշտանգել:

«Անձը վտանգի մեջ է, շփվում է այն մարդու հետ, ով իրեն խոշտանգել է: Իսկ դուք ասում եք ինքնաբացարկի միջնորդությունը քննարկենք»,- դիմելով նախագահող դատավոր Արտուշ  Գաբրիելյանին՝ ասաց փաստաբան Լուսինե Սահակյանը:

Դատավորը նշեց՝ անձը վտանգի մեջ չէ և պետք չէ դատաքննության կարգը խախտել:

«Կարգը դուք եք խախտում»,-հայտարարեց ամբաստանյալ Պավլիկ Մանուկյանը:

Շարունակելով  խոսքը՝ նա նշեց. «Պարոն Գաբրիելյան, առաջին նիստին ես հարց էի տվել, դուք չպատասխանեցիք: Ղազարյանին եթե փոխեք բոզոյանով էլ, կատարվելու է նույն հանցագործությունը,  որովհետև դուք երաշխիք չունեք: Հարգեք ձեր անձը, դուք ի զորու չեք, որովհետև Ղազարյանին փոխարինելը օգուտ չի տալու: Նույն պատմությունն է լինելու: Հերիք եղավ այս ազգի գլխին այս օյինը հանեք: Չկա արդարադատություն: Ես ձեր անձը հարգում եմ: Ափսոսում եմ ձեզ: Ես լսել եմ, որ դուք լավ մարդ եք, բայց չեք կարող լավ դատավոր լինել»:

«Չի կարելի, մի խոսիր Մանուկյան, Պավլիկ: Թույլ չեմ տալիս խոսել: Դուք լռեք»,- դիմելով Պ. Մանուկյանին՝ ասաց դատավորը:

Պ. Մանուկյանը շարունակեց.  «Պահանջում եմ իմ ընկերներին բերեք այստեղ, խոշտանգումից հետո ես նրանց չեմ տեսել»:

Դատավորն ասաց. «Ուրեմն հերթականությումբ, եթե սպասեք, այդ հարցը կքննարկենք: Մանուկյան, նստիր»:

«Ի՞նչ Մանուկյան: Իմ անունը Պավլիկ է, ապարանցի Պավլիկ է»,-ասաց Պ. Մանուկյանը:

«Ապարանցի Պավլիկ, նստիր: Ես դեռ խոսք կտամ քեզ,  վատառողջ ես, նստիր» ,-հավելեց դատավորը:

Պավլիկ Մանուկյանն արձագանքեց. «Ոնց թե նստիր, ինձ բերել ես այստեղ նստեցնելո՞ւ համար»:

Այնուհետև դատավորը հայտարարեց մեկ ժամ ընդմիջում:

Նշենք, որ դեռևս նիստի սկզբում Արայիկ Խանդոյանի փաստաբան Արա Ղարագյոզյանն ասել էր. «Նախորդ նիստին իմ պաշտպանյալները նիստերի դահլիճում և  նիստերից դուրս ենթարկվել էին խոշտանգումների, ծեծի: Այդ խոշտանգումներն ու ծեծը  կատարվել է փոխգնդապետ Ղազարյանի կողմից, ով շարունակում է մեր պաշտպանյալներին  դատարան բերել և նրանց հետ շփվել: Չգիտեմ, հավանական է, կրկին իմ պաշտպանյալը ենթարկվի խոշտանգումների և ծեծի»: