Ձեր վստահելի աղբյուրը

«Պաշտպանական կողմին մեղադրում եք դատական նիստերին անհարկի միջամտելու, ձգձգելու մեջ, սակայն նախագահող դատավորն է դա անում, երբ որ իմ կոլեգաները հայտարարություններ էին անում, բորբոքվեցիք և մեկ ժամ  ընդմիջում հայտարարեցիք»,-Ավան և Նոր Նորք վարչական շրջանների ընդհանուր իրավասության դատարանում շարունակվող «Սասնա ծռերի» 14 անդամների դատավարության ժամանակ ասաց  փաստաբաններից Արա Ղարագյուզյանը՝ դիմելով նիստը նախագահող դատավոր Արտուշ Գաբրիելյանին:

Նաև ավելացրեց, որ մեկ ժամ ընդմիջում հայտարարելու իմաստը պաշտպանական կողմը պարզապես չէր տեսնում. «Պաշտպանական կողմի մոտ կարծիք է ձևավորվում, որ նախագահող դատավորը  չի ցանկանում, որ շարունակվեն դատական նիստերը: Ուզում եմ հիշեցնել դատավորի վարքագծի կանոնները՝ դատավորը պետք է լինի համբերատար, ցուցաբերի զսպվածություն: Պարբերաբար հունից դուրս եք գալիս, ձեր ձայնը բարձրացնում եք: Սա հիմք է տալիս ասելու, որ դուք չեք կարող այս գործով իրականացնել արդարադատություն, այդ աթոռը պետք է շուտափույթ լքեք, այլ դատավոր գա: Միանում եմ իմ գործընկերների՝ ձեզ հայտնած ինքնաբացարկի միջնորդությանը»։

Փաստաբան Տիգրան Հայրապետյանը նույնպես միացավ միջնորդությունը. «Հարգելի դատարան, գաղտնիք չէ, որ թե ամբողջ քրեական գործը և այն գործողությունները, որ կատարվել են, կա քաղաքական դրդապատճառ: Քաղաքական դրդապատճառներով  կատարված գործի նկատմամբ հանրային ուշադրությունը շատ ավելի բարձր է, քան սովորական գործերով: Այստեղ ավելի քան պետք է կարևորվի  արդար, անկախ դատարանի կողմից գործի քննության իրավունքը»։

Փաստաբանի խոսքով, դատավորի կողմից առանց որևէ պատճառի, առանց տրամաբանության մեկ ժամով նիստն ընդմիջելն արհամարհանք է դատական նիստի մասնակիցներին, վիրավորանք է արդարադատության իրականացման գործընթացին:

«Նախագահող դատավորը չպետք է անտրամաբանական, չհիմնավորված որևէ գործողություն անի»,- ասաց Տ. Հայրապետյանը:

Փաստաբան Ինեսա Պետրոսյանը միացավ ներկայացված միջնորդություններին.
«Գտնում եմ, որ այս գործով չեք կարող իրականացնել պատշաճ դատավարություն: Ակնհայտ երևում է, որ ի սկզբանե մեր պաշտպանյալների ամենակարևոր իրավունքը՝  պաշտպանական իրավունքը, խախտվեց»:

Մյուս փաստաբանները նույնպես միացան դատավորին բացարկ հայտնելու միջնորդությանը:

Մեղադրող դատախազը ներկայացված միջնորդությունն անհիմն համարեց և ասաց, որ նախագահող դատավորի կողմից դատավարական կարգի որևէ խախտում թույլ չի տրվել:

Դատարանը հեռացավ խորհրդակցական սենյակ՝ ներկայացված միջնորդության վերաբերյալ որոշում կայացնելու: