Ձեր վստահելի աղբյուրը

Տավուշի մարզի Դիլիջան քաղաքի խմելու ջրի մաքրման հարցը «Վիոլա Ջուր» ընկերության կողմից Ջրային տնտեսության պետական կոմիտեին ներկայացրած առաջիկա տարվա աշխատանքների ծրագրում չկա: Դիլիջանցիները կբացեն ծորակն ու այնտեղից կգա ոչ այն ջուրը, որով հպարտանում է Մհեր Մկրտչյանը հայտնի ֆիլմում:

Բանն այն է, որ «Վիոլա ջուր»-ի հետ կնքած պայմանագրով նախատեսված է՝ ընկերությունն իրականացնելու է պարտադիր կապիտալ աշխատանքներ: Աշխատանքների ծրագիրը նախապես ներկայացվում է Ջրային տնտեսության պետական կոմիտե՝  համաձայնեցնելու համար: Պարտադիր կատարման աշխատանքների ծրագիրը կազմվում է՝  հաշվի առնելով խնդիրների առաջնահերթությունն ու հրատապությունը: Այս պահին համարում են, որ Դիլիջանի ջրի մաքրումից առավել հրատապ խնդիրներ կան, օրինակ, համայնքներ կան, որոնք խմելու ջուր ընդհանրապես չունեն: 

«Ըստ «Վիոլա ջուր» ընկերության ներկայացրած ծրագրի, նախատեսվում է, որ առաջիկա 15 տարիների ընթացքում իրականացվելու են 37.5 մլրդ դրամի աշխատանքներ, որոնք վերաբերում են գույքի պահպանման, վերանորոգման ու որոշակի բարելավման միջոցառումներին: «Վիոլա Ջուր» ընկերության կողմից ներկայացրած այս տարվա  ծրագրում, որի համար կպահանջվի 1.8 մլրդ դրամի ներդրում, Դիլիջանի խմելու ջրի մաքրման աշխատանքները ներառված չեն»,-Panorama.am-ի հետ զրույցում ասաց կոմիտեի մամուլի խոսնակ Սոնա Մարտիրոսյանը:

Այս պահին հստակ հաշվարկ էլ չէ, թե ինչքան գումար է անհրաժեշտ Տավուշի մարզի այդ քաղաքի բնակիչներին մաքուր խմելու ջրով ապահովելու համար: Թե ընկերությունը, թե պետական մարմինը նշում են հսկա ներդրումների մասին:

«Կոմիտեն այս պահին ուսումնասիրում է բոլոր հնարավորությունները, որոնց միջոցով կարելի է ներդրումներ ուղղել Դիլիջանի ջրի մաքրման կայանի վերակառուցման համար: Այս պահին ոչ կոմիտեն, ոչ ընկերությունն այդ տարածքում ռեալ ծրագիր չունեն»,-ասաց Կոմիտեի խոսնակը: