Ձեր վստահելի աղբյուրը

Ինչպես կառավարության նախորդ նիստերը, այսօրվա նիստը ևս սկսվեց վարչապետ Կարեն Կարապետյանի հանձնարարականներով:

Առաջին հանձնարարականը վերաբերում էր բնապահպանական փորձաքննության  կատարելագործման անհրաժեշտությանը:

Կարեն Կարապետյանի խոսքերով՝  ներկայումս գործող շրջակա միջավայրի վրա ազդեցության գնահատման և փորձաքննության օրենսդրական կարգավորումներում անհրաժեշտ է վերանայել ընթացիկ գործունեությունների դասակարգումը, ֆինանսավորման աղբյուրները, ժամկետները և ընթացակարգերը:

«Շրջակա միջավայրի բնագավառում պահանջվում է պատշաճ, կանխատեսելի և ողջամիտ  ժամկետներում իրականացում՝ ըստ միջազգային լավագույն չափանիշների»,-ասաց վարչապետը:

Հաշվի առնելով վերոնշյալը՝  վարչապետը ՀՀ բնապահպանության նախարարին հանձնարարեց երեքամսյա ժամկետում մշակել ու կառավարության աշխատակազմ ներկայացնել հանրապետության շրջակա միջավայրի վրա ազդեցության գնահատման և փորձաքննության մասին օրենքում փոփոխություններ կատարելու, ինչպես նաև բնապահպանական փորձաքննության ոլորտում ինստիտուցիոնալ, կադրային և կառուցվածքային կատարելագործմանն ուղղված առաջարկություններ։

Վարչապետը նաև հանձնարարեց, ըստ անհրաժեշտության հարցը քննարկել շահագրգիռ այլ մարմինների հետ:

«Պարոն Մինասյան, երեք ամիսը շատ չի՞ մի քիչ», - Արծվիկ Մինասյանից հետաքրքրվեց վարչապետը։

Բնապահպանության նախարար Արծվիկ Մինասյանն արձագանքեց. «Կարող ենք մեկ ամսվա ընթացքում էլ անել, պարոն վարչապետ»:

«Ֆիքսեցինք», - նշեց վարչապետը։