Ձեր վստահելի աղբյուրը

Բնական է, որ Նալբանդյան-Մամեդյարով հանդիպումից հետո էական արդյունք չկա և չէր էլ կարող լինել, քանի որ հակամարտ կողմերի դիրքորոշումները խիստ տարբեր են: Լրագրողների հետ այսօր կայացած մամուլի ասուլիսի ժամանակ այս մասին ասաց քաղաքագետ Սուրեն Զոլյանը:

«Ադրբեջանը պահանջում է ողջ Ղարաբաղը, ինչն անընդունելի է անգամ միջազգային հանրության համար: Կողմերը կարող են ամեն օր հանդիպել, բայց դրանից ոչինչ չի փոխվի, քանի դեռ չկան կոնկրետ առաջարկներ: Ադրբեջանի գործելաոճը հետևյալն է. սպասել այնքան, մինչև Հայաստանը այլևս տարածաշրջանային գործոն չի լինի, կթուլանա, ինչպես նաև պարբերաբար հարվածել՝ այսպիսով հյուծելով մեզ»,- ասաց նա՝ հավելելով, որ դրան ի պատասխան՝ Հայաստանի պաշոնական, քաղաքական միտքը խոսքերից այն կողմ չի անցնում, ավելին, ԱԳՆ շենքը կա, իսկ նախարարություն, որպես այդպիսին չկա:

Անդրադառնալով Արցախում կայանալիք նախագահական առաջիկա ընտրություններին՝ Սուրեն Զոլյանը նկատեց՝ ԼՂՀ իշխանությունները, փոխանակ զբաղվեին ազատագրված տարածքների վերաբնակեցման խնդիրներով, հետամուտ եղան սահմանադրական փոփոխություններին՝ երկարաձգելու Բակո Սահակյանի իշխանությունը:

«Սա նախապես ծրագրված  տրիվիալ գործընթաց է, ոչ թե քաղաքական գործընթաց: Եթե որևէ մեկը կասկածում է, որ Բակո Սահակյանը չի ընտրվելու, կուզեի տեսնել այդ թարմ ուղեղին»,- ասաց բանախոսը:

Քաղաքագետն անդրադարձավ նաև «Սասնա ծռերի» անդամների դատավարությունը՝ ընդգծելով, որ դա դատավարություն չէ, այլ համատարած հաշվեհարդար:

«Դատավորների կազմը կարծես հատուկ է ընտրվել: Փոխանակ գործը քննվի, անընդհատ կոնֆլիկտներ են լինում: Դատարանի ներսում «Սասնա ծռերի» անդամները խոտանգումների են ենթարկվում, և սա պատահականություն չէ, այլ ցույց է տալիս իշխանությունների մոտեցումն արդարության հանդեպ»,- ամփոփեց Սուրեն Զոլյանը: