Ձեր վստահելի աղբյուրը

Ավան և Նոր Նորք վարչական շրջանների ընդհանուր իրավասության դատարանում ՊՊԾ գնդի գրավման գործով 18 անդամի դատավարության ժամանակ նախագահող դատավոր Արտուշ Գաբրիելյանը հայտարարեց, որ  ամբաստանյալ Սերգեյ Կյուրեղյանը  դատարանի խուց տեղափոխվելիս գլխի վնասվածք է ստացել:

«Խնդրում եմ այդ հարցի պարզաբանման համար դատական նիստերի դահլիճ հրավիրել Սերգեյ Կյուրեղյանին»,- ասաց դաատավորը, ապա հավելեց, որ կազմվել է զեկուցագիր, արձանագրություն:

Նա ընթերցեց արձանագրությունը. «Սույն թվականի հուլիսի 13-ին Երևան քաղաքի Ավան և Նոր Նորք վարչական շրջանների ընդհանուր իրավասության դատարանի տարածքում  ամբաստանյալ Սերգեյ Կյուրեղյանը մեքենայից իջեցնելուց և իրեն համար նախատեսված խուց ուղեկցման ժամանակ գլուխը պատահաբար խփել է մուտքի ծածկի տակ ամրացված  երկաթյա ամրակին և ճակատային մասում վնասվածք ստացել: Արձանագրությունը կազմել է ուղեկցող գումարտակի  առաջին վաշտի հրամանատարը, ստորագրել է Սերգեյ  Կյուրեղյանը»:

Այնուհետև դիմելով դատարանում գտնվող Սերգեյ Կյուրեղյանին՝ հարցրեց, թե ի՞նչ է պատահել:   Վերջինս ասաց.  «Աստիճաններն իջնելուց գլուխս կպել է դռան վերևի մասին»:

«Ձեր նկատմամբ կարո՞ղ է որևէ մեկը բռնի գործողություն է կատարել, թե՞ պատահաբար է դիպել»,- հարցրեց դատավոր Գաբրիելյանը:

Ամբաստանյալ Կյուրեղյանն ասաց. «Չէ, չէ, պատահաբար է դիպել»:

Դատավորը տեղեկացրեց, որ համապատասխան հետաքննիչ է հրավիրվել, կատարվում է հետաքննություն:

«Հաշվի առնելով, որ այս պահին կատարվում է հետաքննություն, դատարանը համապատասխան իրավապահ մարմիններին դիմելու կարիք չի տեսնում»,- ասաց Ա. Գաբրիելյանը: