Ձեր վստահելի աղբյուրը

«Վարորդական վկայականներն իրականում համարվում են ազգային փաստաթղթեր, ավելին, այդ հարցը կանոնակարգված է կոնվենցիաներով»,-լրագրողների հետ զրույցում անդրադառնալով վարորդական վկայականների վերաբերյալ ՌԴ պետդումայի ընդունած որոշմանը, ասաց արդարադատության նախարար Դավիթ Հարությունյանը:

Լրագրողները կարծիք հայտնեցին, որ դա հնարավոր է ընկալվի Հայաստանի դեմ սանկցիա, ինչի պարագայում Հայաստանը պետք է արձագանքի:

Նախարարն էլ ասաց,  որ յուրաքանչյուր երկիր ինքն է որոշում թույլ տա՞լ այլ երկրի կողմից տրամադրված վարորդական իրավունքի վկայականի գործածումը իր տարածքում, թե ոչ. «Կարող է թույլ տալ այլ երկրի կողմից տրված վարորդական իրավունքի վկայականի օգտագործումը որոշակի ժամանակաշրջանում, կարող է նաև թույլ չտալ»:

Որպես օրինակ նա հիշեցրեց, երբ պատերազմական Սիրիայից Հայաստան եկան մեր հայրենակիցները, նրանց վարորդական վկայականներն այստեղ չէին գործում: ՀՀ կառավարությունը հատուկ որոշում ընդունեց, նրանց ժամանակ հատկացնելու և այդ ընթացքում անհրաժեշտ քննությունները հանձնելու համար: 

«Նմանատիպ երևույթ կա աշխարհի բազում երկրներում: Դրա միակ շրջանցման ելքը միջազգային վարորդական իրավունքի վկայական ունենալն է,  որը գործում է  բոլոր երկրներում, ուղղակի հնարավորություն չի տալիս կատարել վարձու աշխատանք»,-ասաց նա:

Հիշեցնենք, հունիսի 1-ից  Ռուսաստանում ուժի մեջ է մտել արգելքը, ըստ որի միգրանտ-վարորդները չեն կարող նստել մեքենայի ղեկին առանց ռուսական վարորդական վկայականի: Ռուսական վարորդական վկայական չունենալու  դեպքում իրավախախտին սպառնում է մինչև 50 հազար ռուբլի տուգանք:  Իրավախախտն այս դեպքում համարվում է ոչ թե վարորդը, այլ գործատուն, ով պարտավոր է հետևել օրենքի պահանջին:

Նման փոփոխությունների համար հիմք է հանդիսացել վիճակագրությունը: Աղբյուրը նշում է, որ 2013-ին միգրանտ վարորդների մասնակցությամբ պատահարների մեծ թիվ է գրանցվել: Նախագծի հեղինակները դրա  անհրաժեշտության մեջ համոզվեցին 2013-ի հուլիսին Մերձմոսկվայում Հրաչյա Հարությունյանի մասնակցությամբ պատահարից հետո:

Աղբյուրը նշում է, որ «Կամազ»-ով ուղևորներով լի ավտոբուսի մեջ մխրճվելու հետևանքով 18 մարդ մահացել էր, տասնյակները՝  վնասվածքներ ստացել: