«Իզվեստիա». Հայաստանի և Ադրբեջանի նախագահների հանդիպման գործում գլխավոր միջնորդը Մոսկվան է դառնում

Քաղաքական 14:00 17/07/2017 Աշխարհում

Ռուսաստանը ձգտում է կազմակերպել Հայաստանի և Ադրբեջանի նախագահների հանդիպում մինչև տարեվերջ: Մոսկվան այդ հարցում գլխավոր միջնորդ է դարձել, քանի որ ՄԽ մյուս համանախագահների փորձերը՝ նստեցնել կողմերին բանակցությունների սեղանի շուրջ, ձախողվել են: Այս մասին «Իզվեստիա»-ին ասել է ՌԴ ԱԳՆ բարձրաստիճան պաշտոնյան:

Ավելի վաղ, ԵԱՀԿ արտգործնախարարների ոչ պաշտոնական հանդիպման շրջանակներում ՌԴ արտգործնախարար Սերգեյ Լավրովը բանակցություններ էր վարել իր հայ և ադրբեջանցի գործընկերների հետ: Հենց այդտեղ էլ առաջարկ է արվել կազմակերպել նախագահների մակարդակով հանդիպում:

ՌԴ ԱԳՆ բարձրաստիճան պաշտոնյայի խոսքով, կազմակերպչական հարցերով զբաղվում է Մոսկվան:

«Դրան միայն մենք ենք մասնակցում: Ֆրանսիացիները փորձեցին Երևանին ու Բաքվին նստեցնել բանակցությունների սեղանի շուրջ, սակայն դա որևէ օգուտ չտվեց: Միաժամանակ երկխոսության պահպանումը սկզբունքային նշանակություն ունի: Հենց դրա շնորհիվ է, որ տարածաշրջանում լայնամասշտաբ պատերազմ չի բռնկվել: Սակայն կողմերի նպատակներն ու տեսլականն առայժմ տարբեր են»,- ասել է ՌԴ ԱԳՆ ներկայացուցիչը:

Պետդումայի ԱՊՀ, եվրասիական ինտեգրացիայի և հայրենակիցների հետ կապերի կոմիտեի ղեկավար Լեոնիդ Կալաշնիկովը կարծում է, որ բարձր մակարդակի հանդիպումը հիմա արդիական է:

«Այն ոչ միայն պետք է, այլև ծայրահեղ անհրաժեշտ: Պետք չէ վազվզել տարբեր ձևաչափերով և հարթակներով, խորհրդակցել երկրների հետ, որոնք 10 հազար կիլոմետր հեռու են տարածաշրջանից: Հարևանները պետք է պայմանավորվեն: Այդ իմաստով պետք է ուժեղացնել համակարգումը Մոսկվայի հետ: Դրա համար էլ ողջունում եմ նման հանդիպման հնարավորությունը, դա դրական խթան կդառնա: Ես կողմ եմ Հայաստանի և Ադրբեջանի առաջնորդների միջև հնարավորինս շուտ բանակցությունների անցկացմանը: Դա առաջին հերթին պետք է այդ երկրներին»,- ասել է Կալաշնիկովը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: