Ձեր վստահելի աղբյուրը

«Ոստիկանությունը սպասում է Արայիկ Խանդոյանի՝ օրերս Ավան և Նոր Նորք վարչական շրջանների ընդհանուր իրավասության դատարանի նկուղային հարկում ծեծի ենթարկվելու գործով նախաքննության ավարտին: Միաժամանակ այդ գործով նշանակված ծառայողական քննություն չկա»,-լրագրողների հետ զրույցում այս մասին տեղեկացրեց Ոստիկանության հասարակայնության հետ կապերի և լրատվության վարչության պետ Աշոտ Ահարոնյանը:

Հարցին՝ ի՞նչ դասեր քաղեցինք մեկ տարի առաջ ոստիկանության ՊՊԾ գնդի գրավման դեպքից, ոստիկանության ներկայացուցիչը պատասխանեց. «Կարծում եմ՝ ավելի ուշ կարելի է  այդ հարցին պատասխանել, քանի որ այս պահին դատաքննություն է գնում, և ոստիկանությունը ձեռնպահ է մնում որև կարծիք հայտնել»:

Լրագրողները նաև հետաքրքրվեցին՝ հնարավո՞ր է, որ Ջրառատի գյուղապետի տեղակալը դատարանի դահլիճից աղմկահարույց գործի շրջանակներում ազատ արձակվեց, քանի որ փոխոստիկանապետ Լևոն Երանոսյանի մերձավորն է: Ի պատասխան՝ Աշոտ Ահարոնյանը նկատեց, որ չի կարող պատասխանել դատաքննության փուլում գտնվող գործին վերաբերող հարցերին.«Որևէ նախաքննություն չի կարելի կապել կոնկրետ անձի հետ: Կա նախաքննություն և նախաքննությունն ընթացքի մեջ է»,- ասաց նա:

Արդյոք ոստիկանությունը բացառո՞ւմ է ՊՊԾ գնդի գրավման կրկնությունը, հարցին էլ ուժային գերատեսչության ներկայացուցիչը պատասխանեց՝ ոստիկանությունը կանխատեսումներով չի զբաղվում, այլ բացահայտում և կանխարգելում է հնարավոր հանցագործությունները՝ պահպանելու հասարակական կյանքը: Իսկ թե ինչու ոստիկանությունը չկարողացվ կանխարգելել անցած տարվա ողբերգական դեպքերը, Աշոտ Ահարոնյանը բացատրեց հանգամանքով, որ հանցագործություններ կատարվում են աշխարհի բոլոր երկրներում:

Զրույցի ավարտին ոստիկանության ներկայացուցիչն անդրադարձավ նաև կոլեգիայի նիստին հետևած փոխատեղություններին՝ տեղեկացնելով, որ փոխատեղվել են ոստիկանության Վայքի և Եղեգնաձորի պետերը: