Ձեր վստահելի աղբյուրը

«Արմենիա» հեռուստաընկերության «Ռ-էվելյուցիա» հաղորդման ընթացքում ՀՀ նախագահ Սերժ Սարգսյանի խոսքի՝ ԼՂ հիմնախնդրի կարգավորմանը վերաբերող հատվածն ուներ իր հստակ շեշտադրումները՝ անվտանգային բաղադրիչի, Հայաստանի արտաքին գերակա ուղղությունների և համագործակցային ասպեկտների վերաբերյալ։ Panorama.am-ի թղթակցի հետ զրույցում այս մասին ասաց քաղաքագետ Ալեքսանդր Մարկարովը։

«Երկրի ղեկավարի խոսքի մյուս հատվածը, որի վրա կարելի է ուշադրություն դարձնել, Հայաստանի Հանրապետության ներքին անվտանգային տարրի ուժեղացմանը վերաբերող հատվածն է։ Խոսքը, մասնավորապես, հանրության և բանակի միջև առկա կապի մասին է։ Բնականաբար, երկրի ղեկավարի խոսքում շեշտադրում կար հայ-ռուսական համագործակցության, ներքաղաքական, տնտեսական զարգացումներին մասով»,- նշեց քաղաքագետը։

Ալեքսանդր Մարկարովի խոսքով, ՀՀ նախագահ Սերժ Սարգսյանի ելույթն ուղղված էր ինչպես ներքին, այնպես էլ արտաքին լսարանին, սակայն հատկապես մի քանի շեշտադրումներ միանշանակորեն ուղղված էին արտաքին լսարանին։

«Կարծում եմ՝ կար նաև ակնկալիք, որ արտաքին լսարանը կարձագանքի խնդիրներին և հարցադրումներին, որոնք շարադրված էին երեկվա ելույթում։  Խոսքը և ԵԱՀԿ Մինսկի խմբի համանախագահներին, և Ռուսաստանին, և տարաաշրջանում հետաքրքրություններ ունեցող մի շարք այլ դերակատարներին հասցեագրված ուղերձների մասին է»,- ամփոփեց Ալեքսանդր Մարկարովը։

Հիշեցնենք, որ երեկ ՀՀ նախագահը «Ռ-էվելյուցիա» հաղորդման ընթացքում  անդրադարձել էր Արցախյան հակամրտության կարգավորման, տնտեսական և ներքաղաքական մի շարք հարցերի։