Ձեր վստահելի աղբյուրը

Ուղիղ մեկ տարի առաջ՝ 2016թ-ի հուլիսի 17-ին 31 զինված անձինք գրավեցին Երևանի Էրեբունի վարչական շրջանի ոստիկանության պարեկապահակային պահպանության գունդը: Զինված խմբավորման առաջնորդները հայտարարում էին, որ իրենք դիմել են «զինված ապստամբության» ճանապարհով ընդվզման, քանի որ դա էին համարում ազգի և երկրի փրկության միակ տարբերակը և ժողովրդին կոչ էին անում միանալ իրենց:

Զինված խմբավորման գործողության առաջին րոպեներին զոհվեց ոստիկանության գնդապետ Արթուր Վանոյանը: Հուլիսի 30-ին գրավված ՊՊԾ գնդի տարածքից արձակված կրակոցից զոհվեց ոստիկանության զորքերի զինծառայող, ենթասպա Յուրի Տեփանոսյանը: Ավելի ուշ՝ օգոստոսի 13-ին մահացավ նաև ոստիկանության ավագ ենթասպա Գագիկ Մկրտչյանը, ով հուլիսի 17-ին` ոստիկանության ՊՊԾ գնդի գրավման օրը, ոստիկանների և «Սասնա ծռեր» խմբավորման անդամների միջև տեղի ունեցած բախման հետևանքով ծանր վիրավորում էր ստացել:

ՊՊԾ գնդի գրավումից հետո զինված խումբը ոստիկանական բազայում պատանդ էր վերցրել փոխոստիկանապետ Վարդան Եղիազարյանին, Երևանի ոստիկանապետի տեղակալ Վալերի Օսիպյանին և ևս վեց ոստիկանի: Ավելի ուշ հայտնի դարձավ, որ զինված խմբի մոտ պատանդի կարգավիճակում պահվում է 3 բուժաշխատող՝ չնայած նրանց, որ խմբավորման անդամները հայտարարում էին, թե բժիշկներից ոչ մեկին պատանդ չեն պահում՝ ընդամենը նպատակն այն է, որ այնտեղ բժշկական ներկայությունը լինի տևական և հերթափոխով:

Խմբավորումը պահանջ էր դրել, որպեսզի գործող իշխանություններըը հրաժարական տան և իշխանությունը փոխանցվի «վստահության կառավարությանը»: Ազգային անվտանգության ծառայության և ոստիկանության ուժերի կողմից ՊՊԾ գնդի տարածքը շրջափակելուց հետո ստեղծվեց պատային վիճակ՝ իրավապահները պահանջում էին ցած դնել զենքը ու հանձնվել: Միևնույն ժամանակ խմբավորման արարքը պաշտոնական հայտարարություններում որակվեց որպես որպես ահաբեկչություն:

Բանակցությունների արդյունքում և մամուլի կետ բացելու վերաբերյալ պահանջն իրականացնելուց հետո ՊՊԾ գնդի տարածքից պատանդառված ոստիկաններն ազատ արձակվեցին:

Հուլիսի 17-ից մինչև զինված խմբի հանձնվելու մասին որոշումը՝ հուլիսի 31-ը, ՊՊԾ գնդի հարևանությամբ, մասնավորապես՝ Խորենացի փողոցում և Սարի թաղում իրավիճակը բավականին լարված էր, քանի որ խմբավորմանն աջակցող ցուցարարների, ուղղակի քաղաքացիների, ովքեր պարզապես չէին ուզում արյունահեղություն և իրավապահ մարմինների ներկայացուցիչների միջև մերթընդմերթ բախումներ էին տեղի ունենում:

Ամենացավալի բախումը տեղի ունեցավ հուլիսի 29-ի գիշերը: Ոստիկանների գործողությունների արդյունքում և կիրառած «հատուկ միջոցներիի» պատճառով վիրավորվեցին և վնասվածքներ ստացան հարյուրավոր քաղաքացիներ, բերման ենթարկվեց 165 քաղաքացի:

Ոստիկանների կողմից հատուկ ու նպատակաուղղված ծեծի ենթարկվեցին նաև լրագրողներ, վիրավորվեցին կիրառած հատուկ միջոցներից:

Ըստ պաշտոնական հաղորդագրությունների՝ լրագրողների և քաղաքացիների դեմ բռնություն կիրառած մարդկանցից ձերբակալվել են, բայց նրանցից ոչ մեկի անունը չի հրապարակվել:

Իշխանությունների և զինված խմբավորման անդամների միջև միջնորդական մի շարք փորձերից հետո, ինչպես նաև՝ ՊՊԾ գնդի տարածքում ստեղծված դժվարին իրավիճակով պայմանավորված՝ հուլիսի 31-ին «Սասնա ծռերը» որոշում կայացրին հանձնվել ոստիկանությանը:

Այժմ ոստիկանության ՊՊԾ գնդի գրավման  գործով անցնում է 32 հոգի: Դատավարությունն ընթանում է արտագնա նիստերով` Երևանի Ավան և Նոր Նորք վարչական շրջանների ընդհանուր իրավասության դատարանում:

Մանրամասն՝ հարակից նյութերում: