Ձեր վստահելի աղբյուրը

2016 թվականի հուլիսի 17-ին «Սասնա ծռեր» զինյալ խմբի կողմից Ոստիկանության ՊՊԾ գնդի գրավման ժամանակ սպանված ոստիկանների հիշատակը հարգելու էին գնացել ավելի քան 20 հազար քաղաքացիներ։

Սպանված ոտիկաններ գնդապետ Արթուր Վանոյանի, լեյտենանտ Յուրի Տեփանոսյանի, ավագ ենթասպա Գագիկ Մկրտչյանի  հիշատակն հավերժացնող «Պատիվ ունեմ» հուշակոթողին  ծաղիկներ դնելու էին եկել ոչ միայն ոստիկանների հարազատները, այլ նաև բազմահազար քաղաքացիներ, քաղաքացիական հասարակության ներկայացուցիչներ, ներկա ու նախկին պաշտոնյաներ, ոստիկանության համակարգի աշխատակիցներ։

«Մհեր Մկրտչյան Գագիկի, իմ պապան միլիցա է»,- վերհիշելով հայրիկին՝ ասում է զոհված ավագ ենթասպա Գագիկ Մկրտչյանի որդին՝ փոքրիկ Մհերը։ Նրա հուշերում դեռ թարմ են այն բոլոր պահերն ու վայրկյանները, որոնք անցկացրել է հայրիկի հետ։
Մհերն, ի դեպ, հայրիկի համար նվեր էր բերել՝ խաղալիք ոստիկանական մեքենա։ Վեց ամյա փոքրիկն անձայն նվերը դրեց հոր նկարի առաջ ու հեռացավ. վստահ է, որ այն տեղ է հասնելու։
Վիշտն ու ցասումը արդեն մեկ տարի պատել են ավագ ենթասպա Գագիկ Մկրտչյանի մորը՝ տիկին Անահիտին։ Արցունքներն աչքերին՝ տիկին Անահիտը չի հաշտվում տեղի ունեցածի հետ.
«Շատ դաստիրակված էր Գագիկս։ Նա արժանի չէր նման ճակատագրի»։

Սպանված ոստիկանների հիշատակն հավերժացնող ՊՊԾ գնդի մուտքի մոտ տեղադրված հուշատախտակին ծաղիկներ դրեցին մի շարք բարձրաստիճան պաշտոնյաներ, պատգամավորներ։ Հիշատակի միջոցառմանը ներկա էր նաև ոստիկանապետ Վլադիմիր Գասպարյանը։

Ազգային անվտանգության ծառայության նախկին տնօրեն Դավիթ Շահնազարյանն համոզված է, որ այսօրվա իր ներկայությամբ հայ հասարակությունն ապացուցում է, որ չի հանդուժել և չի հանդուրժելու զենքի միջոցով քաղաքական հարցեր լուծելու վտանգավոր մեթոդը։

Նկատենք, որ զուգահեռ Երևանում ընթանում էր նաև զինյալ խմբի աջակիցների հավաքը երթը։
 Երթին ներկա էին մոտ 200 հոգի։