Ձեր վստահելի աղբյուրը

Ավան և Նոր Նորք վարչական շրջանների ընդհանուր իրավասության դատարանում շարունակվում է  ՊՊԾ գնդի գրավման գործով 14 անդամի դատական նիստը:

Դատավոր Արտուշ Գաբրիելյանը տեղեկացրեց, որ Սմբատ Բարսեղյանի  փաստաբան Հայկ Ալումյանը դատարան գրություն է ուղարկել և տեղեկացրել, որ մեկ այլ դատական նիստի է ու չի կարող ներկայանալ դատարան:

«Փաստորեն 5 դատական նիստ ենք անցկացրել, ամբաստանյալ Սմբատ Բարսեղյանի շահերի պաշտպան Հայկ Ալումյանը չի ներկայացել դատական նիստերի»,- նշեց դատավորը:

Այնուհետև նա ասաց, որ Սմբատ Բարսեղյանը կարող է հրաժարվել իր պաշտպանից: Սմբատ Բարսեղյանը նշեց, որ այլ պաշտպան չի ցանկանում ունենալ և համաձայն է, որ իր պաշտպանի բացակայության պայմաններում դատական նիստը շարունակվի:

Նախագահող դատավորը հայտարարեց, որ դիմում են ստացել Սեդրակ Նազարյանի, Էդվարդ Գրիգորյանի պաշտպան Լուսինե Սահակյանից, ով տեղեկացրել է, որ 2017 հուլիսի 18-ից օգոստոսի 9-ը գտնվելու է արձակուրդում, բացակայելու է Հայաստանից,  նշված ժամանակահատվածում նիստերին մասնակցել չի կարող: Նա նշեց, որ Երվանդ Վարոսյանը նշանակվել է Սեդրակ Նազարյանի, էդվարդ Գրիգորյանի պաշտան: Փաստաբանն ու ամբաստանյալները համաձայնվեցին նիստերը շարունակել առանց Լուսինե Սահակյանի ներկայություն:

Այնուհետև դատավորն առաջարկեց օգոստոսի 1-15-ը բոլորով գնալ արձակուրդ, այնուհետև գալ և շարունակել նիստերը:  Փաստաբան Հրանտ Գևորգյանը ասաց, որ իրենք չեն կարող ընտրել հենց այդ օրերը, քանի որ ունեն նաև այլ դատավարություններ: 

Այնուհետև դատավորն ասաց, որ ամբաստանյալներ Արայիկ Խանդոյանի և Արմեն Լամբարյանի շահերի պաշտպան Արայիկ Պապիկյանը ևս գրություն է ներկայացրել դատարան, որ այլ նիստի է, այս նիստին կներկայանա 40 րոպե ուշացումով: Արտուշ Գաբրիելյանը  նշեց, որ պաշտպանը դատարանի տարածքում էր  և չի մտնել շենք. «Արձանագրություն է կազմվել, որ չի ցանկանում խուզարկվել, դրա համար էլ չի մտնել նիստերի դահլիճ»:

Դատարանը ընդմիջում հայտարարեց, որից հետո դատավոր Արտուշ Գաբրիելյանը հայտարարեց, որ դատական սանկցիա է կիրառվում փաստաբաններ Մուշեղ Շուշանյանի և Արայիկ Պապիկյանի նկատմամբ:  Դատարանը կդիմի Փաստաբանների պալատ` փաստաբաններին պատասխանատվության ենթարկելու պահանջով:

Նիստին ներկա փաստաբանները դժգոհություն արտահայտեցին: Դատական նիստը կրկին դադարեցվեց: Դատարանը գնաց խորհրդակցական սենյակ՝   այս անգամ ամբաստանյալ Պավլիկ Մանուկյանի փաստաբան Հարություն Բաղդասարյանի նկատմամբ դատական սանկցիա կիրառելու վերաբերյալ որոշում կայացնելու: