Ձեր վստահելի աղբյուրը

Սևանա լճի ստորջրյա ավազանի հերթական ութերորդ հետազոտական արշավը կիրականացվի 2017 թվականի հուլիսի 17-ից 26-ն ընկած ժամանակահատվածում:

Ստորջրյա հետազոտությունների և սուզումների հայկական կենտրոնի հաղորդմամբ, նախորդ արշավների արդյունքները բավականին հուսադրող էին և արդյունավետ հայ գիտնականների համար: Ֆրանս-հայկական այս առաքելությունը իրականացվում է ծրագրի երկու պատասխանատուների՝ Կլոդ Թուլումջյանի (նախաձեռնող), Ստեփան Կոջայանի և ՀՀ Գիտությունների Ազգային Ակադեմիային գիտահետազոտական ինստիտուտների, Երևանի պետական համալսարանի դասախոս-գիտաշխատողների, ինչպես նաև Բնապահպանության նախարարության  և որոշ պետական մարմինների, այդ թվում՝ «Սևան Ազգային պարկի»   հետ սերտ համագործակցությամբ:

2012թ-ից սկսած Սևանա լճի ստորջրյա  գիտարշավները իրականացվում են Ստորջրյա հետազոտությունների և սուզումների հայկական կենտրոնի (ՍՀՍՀԿ) պատասխանատվության ներքո: Հայկական այս կազմակերպությունը հիմնադրվել է 2012թ-ի մարտին՝ նախագահ Կլոդ Թուլումջյանի և փոխնախագահ Արա Ավագյանի ղեկավարությամբ (ՍՀՍՀԿ-ի հիմնախնդիրները ներկայացվում են կցված փաստաթղթում): Գիտարշավներին իր կարևոր աջակցությունն է ցուցաբերում ՀՀ-ում Ֆրանսիայի դեսպանությունը և Հայաստանի Բնապահպանության Նախարարությունը: ՍՀՍՀԿ-ը հիմնականում զբաղվում է ստորջրյա սուզումներով և նպատակաուղղված է զարգացնել այս ոլորտը Հայաստանում:

Այս տարի գիտարշավի նպատակն է ընդլայնել ստորջրյա հետազոտությունների շրջանակը դեպի դեռևս չբացահայտված վայրեր:

Աղբյուրը հիշեցնում է, որ մինչ օրս Սևանա լճի մեծ մասն ուսումնասիրված չէ սուզորդների կողմից: ՍՀՍՀԿ-ն նպատակներից մեկն է նաև հարստացնել www.sevanlalke.am ինտերնետային կայքը՝ Սևանա լճի և նրա վտակների բուսական և կենդանական աշխարհը ներկայացնող ստորջրյա լուսանկարներով և տեսանյութերով: ՀՀ-ում Ֆրանսիայի դեսպանությունը, կնքելով համագործակցության համաձայնագիր, ՍՀՍՀԿ-ին է վստահել www.sevanlalke.am ինտերնետային կայքի պատասխանատվությունը, ինչը հանդիսանում է Սևանա լճի բնապահպանական խնդիրների մեդիատիզացիա կաևորագույն միջոց։ Հուլիսի 10 -ին ՍՀՍՀԿ-ն հանդիպել է Սևան քաղաքի դպրոցականների, քննարկել նրանց հետ Սևանա լճին առնչվող հարցեր, ներկայացրել լճի ստորջրյա աշխարհը և նրանց սպառնացող խնդիրները։

«Հայաստանում ստորջրյա սուզումները զարգացնելու նպատակով ՍՀՍՀԿ-ն 2017 թ. հուլիսի 22-ին ժամը 10:00-ից 17:00-ը հրավիրում է բոլոր ցանկացողներին կատարելու սուզորդային
«մկրտություն» Սևանա լճում: Այս սուզման անվճար առաջին փորձը  նախապայմաններ ունի: Մասնակցության տեղերը սահմանափակ են, ինչի համար անհրաժեշտ է նախապես գրանցվել՝ գրելով [email protected] էլ. հասցեին, նշելով ձեր ազգանունը, անունը, ծննդյան տարեթիվը, հասակը, քաշը, կոշիկի չափսը և հեռախոսահամարը: Կընդունվեն առաջին 15 գրանցվողները: Յուրաքանչյուր թեկնածու միևնույն օրը կանցնի թեստավորում՝ 50 մ հեռավորության վրա լող՝ լաստերով, դիմակներով և շնչառական ապարատներով, որոնք կտրամադրվեն անհրաժեշտության դեպքում»,-  նշված է ՍՀՍՀԿ-ի հաղորդագրության մեջ: