Ձեր վստահելի աղբյուրը

Երևանի քաղաքապետարանի աշխատակիցներն այսօր առավոտից փորձում են ապամոնտաժել Ֆիրդուսի շուկայի տաղավարները, սակայն շուկայի աշխատակիցները թույլ չեն տալիս: Նրանց  խոսքով, տեղյակ էին, որ նման ծրագիր կա, բայց որ այսօր առավոտյան սկսվելու է, տեղյակ չեն եղել: 

«Ախր դուք չեք կարողանում բացատրել քանդելու իմաստը: Ձեր բացատրածը մեզ ձեռք չի տալիս: Թող այնպիսի մարդ գա, որ կարողանա մեր հարցերին հստակ պատասխանի՝ գրավոր, մենք ինքներս մեր ձեռքով ամեն ինչ կկտրենք, կքանդենք: Դուք ոչ մի թուղթ չեք ներկայացում, որ պետք է սա անեք»,- ասաց տեղի բնակիչներից մեկը:

Նա նշեց, որ ասում են՝ իրացման գոտի է. «Բա էդ իրացնողներից մեկը չգա՞  մեզ հետ խոսի, ասի ձեզ բնակարան եմ տալիս, գումար եմ տալիս կամ հող եմ տալիս, ասի՝ մեր առաջարկները սրանք են: Մեզ ձեռք կտա՝ կհամաձայնվենք, ձեռք չի տա՝ կպայքարենք»:

«Ով ինչ ուզում,  էն էլ անում է ժողովրդի գլխին: Թե չէ որ առևտրականները դուրս եկան, ի՞նչ եք շահելու, ի՞նչ եք անելու: Տանտերերը մնալու են էլի: Ի՞նչ իմաստ ունի ձեր արածը»,- ասաց  շուկայի աշխատակիցներից մեկը: 

Մյուսն էլ շարունակեց. «Իրենք գործ չեն տալիս, գործն էլ ձեռքներից խլում են»:

Շուկայի աշխատակիցներն ուզում են, որ իրենց այստեղ աշխատելու ժամանակ տան, մինչև կարողանան պարտքերը, վարկերը փակել, այնուհետև կհեռանան:

Նշենք, որ հունիսի 5-ին Երևանի քաղաքապետարանում տեղի ունեցած աշխատանքային խորհրդակցության ժամանակ հայտարարվել էր, որ  առաջիկայում տվյալ տարածքում մեկնարկելու են շինարակական աշխատանքներ, քաղաքապետ Տարոն Մարգարյանը հանձնարարել էր բանակցել մայրաքաղաքում գործող տոնավաճառների և շուկաների սեփականատերերի հետ՝ վերոնշյալ առևտրականների գործունեությունն առևտրային այլ տարածքներ տեղափոխելու համար: