Ձեր վստահելի աղբյուրը

Անցած տարվա հուլիսի 17-ին ՊՊԾ  գունդը գրավելուց  երկու օր անց՝  հուլիսի 19-ին, Սարի թաղում բախումներ էին տեղի ունեցել բնակիչների  և ոստիկանների միջև, ինչից հետո կալանավորվել էր  Սարի թաղի 10 բնակիչ: Նրանց մեղադրանք է առաջադրվել ՀՀ Քրեական օրենսգրքի 316-րդ հոդվածի (Իշխանության ներկայացուցչի նկատմամբ բռնություն գործադրելը) 2-րդ մասի հատկանիշներով: 

Լրագրողների հետ հանդիպմանը այս գործով անցնող 5 հոգու փաստաբան Լիպարիտ Սիմոնյանն ասաց, որ տեղի ունեցած միջադեպը կրում էր կենցաղային բնույթ:

«Այդ մարդիկ դուրս էին եկել ոչ թե իրենց աջակցությունը հայտնելու կամ չհայտնելու տեղի ունեցած իրադարաձություններին, ընդամենն իրենց մտահոգություն էին հայտնում, որ երկու օր է զրկված են  գազից, ջրից, տրանսպորտ չի աշխատում դեպի Սարի թաղ»,-  նշեց նա:

Փաստաբանի խոսքով, արդեն մեկ տարի է քրեական գործ է հարուցված, այդ ընթացքում առաջադրված մեղադրանքներից դեռևս որևէ մեկին հասկանալի չէ, թե այդ 10 աձնից որևէ մեկը կոնկրետ ինչ գործողության համար է մեղադրվում:

«Որևէ մեկը չգիտի, թե կոնկրետ իր որ գործողությունն է, որ բերել է իրեն այդ մեղադրանքի»,- նշեց Լ. Սիմոնյանը՝ միաժամանակ հավելելով, որ  մարդուն մեղադրանք առաջադրելու համար պետք է հստակ ձևակերպված լինի, թե անձը կոնկրետ ինչ գործողություններ է կատարել և արդյոք այդ գործողությունները համապատասխանում են օրենսգրքի տվյալ նորմին:

Նա նշեց, որ գործը գտնվում է դատարանում, բաժանված է չորս մասի: Նիստերը մեծ ընդհատումներով է տեղի ունենում:

Փաստաբանն ասաց, որ նմանատիպ գործերով, երբ անորոշ մեղադրանք է, որևէ բան չի խանգարում պետությանը, որ նրանց նկատմամբ գոնե գրավ կիրառի որպես խափանման միջոց:

Լ. Սիմոնյանի խոսքով, հայաստանյան իրավական ատյանները սպառելուց հետո ՄԻԵԴ կդիմեն:

«Մենք պաշտպանվում ենք առաջադրված մեղադրանքից: Եթե պետությունը նրանցից որևէ մեկին գտներ, որ այլ մեղադրանք պետք է առաջադրի, գուցեև նրանցից մեկնումեկն ասեր, որ կատարել է այդ գործողությունը: Բայց քանի դեռ այս պահի դրությամբ առաջադրված է մի մեղադրանք, որը գոնե անորոշ է, փաստական տվյալներով էլ չի հիմնավորվում, բնականաբար, մեղքը չեն ընդունի, իրենց անունից եմ ասում»,- ասաց փաստաբանը:

Ասուլիսին ներկա Սարի թաղի կալանավորված բնակիչ Էդուարդ Զեյթունյանի կինը՝  Լալա Բեռնեցյանն ասաց, որ ամուսինը սրտի, ողնաշարի խնդիր ունի: Նա նաև նշեց, որ դժգոհ է քրեական գործի ընթացքից:

«Եթե ունենային ապացույց, մեկ տարվա ընթացքում կարող էին դատապարտել»,- հավելեց նա: