Ձեր վստահելի աղբյուրը

Այսօր ՊՊԾ գնդի գրավման գործով 14 անդամի դատավարության ժամանակ  ինը փաստաբան բոյկոտեցին նիստն ու հեռացան նիստերի դահլիճից:  Դատավոր Արտուշ Գաբրիելյանը խորհրդակցական սենյակից վերադառնալուց հետո հայտարարեց, որ նրանց նկատմամբ կիրառվում է դատական սանկցիա, պատասխանատվության ենթարկելու համար դիմել են Փաստաբանական պալատ:

Նա նաև հայտարարեց, որ փաստաբան Մուշեղ Շուշանյանի նկատմամբ  այսօր նույնպես դատական սանկցիա էր կիրառել, քանի որ վերջինս  հրաժարվել էր մտնել դատարան:  Այնուհետև դատավորը դիմեց ամբաստանյալ Վարուժան Ավետիսյանին, քանի որ նրա պաշտպաններ Մուշեղ Շուշանյանն արդեն 4 անգամ, իսկ Արա Զաքարյանը 5 անգամ չեն ներկայացել դատական նիստերին, արդյոք ունի այլ պաշտպան՝ դատարան հրավիրելու համար:

Վարուժան Ավետիսյանն ասաց, որ իր պաշտպաններից չի հրաժարվում,  նրանք շարունակում են մնալ իր պաշտպանները:

«Չեմ ուզում ուրիշ այլ պաշտպաններ ունենալ: Եթե տանում եք նրանց, որ ի վերջո հանրային պաշտպան ինձ պարտադրեք, դա չի լինելու»,- ասաց նա:

Այնուհետև դատավորը դիմեց ամբաստանյալ Արայիկ Կյուրեղյանին, ում պաշտպանը նույնպես Մուշեղ Շուշանյանն է. «Կարո՞ղ եք նրան այլ պաշտպանով փոխարինել»:

Ա. Կյուրեղյանն ասաց, որ իր պաշտպանն է Մ. Շուշանյանը ու մնում է իր պաշտպանը:
Կյուրեղյանը նաև ասաց, որ իր համար սա դատական նիստ չէ, որպես այդպիսն չի ընդունում:
«Չեմ հարգում դատարանին՝ պարզ ու հստակ»,- նշեց նա:

«Խնդրում եմ կոռեկտ վերաբերվել դատարանի նկատմամբ: Քանի որ չեք հարգում դատավորին և հաշվի առնելով, որ անհարգալից վերաբերմունք եք դրսևորում  նախագահող դատավորի նկատամաբ՝ դատական սանկցիա է կիրառվում ձեր նկատմամբ՝ նախազգուշացում»,- ասաց դատավոր Գաբրիելյանը:

«Մեկ անգամ էլ եմ ասում, որ չեմ հարգում դատարանը»,- ասաց ամբաստանյալ Կյուրեղյանը:
Դատավորն այս անգամ սանկցիա կիրառեց Ա.Կյուրեղյանի նկատմամբ՝ դահլիճից հեռացում 10 ժամով:

Ամբաստայալ Գագիկ Եղիազարյանը նույնպես հայտարարեց, որ չի հրաժարվում իր պաշտպաններից, ովքեր նույնպես, ինչպես նշեց դատավորը, մի քանի նիստ չեն ներկայացել:
Դատական նիստը կշարունակվի հուլիսի 26-ին: