Ձեր վստահելի աղբյուրը

Նալբանդյան-Մամեդյարով վերջին հանդիպումն, ամենայն հավանականությամբ, ուղղված էր երկու երկրների ղեկավարների հանդիպումը նախապատելուն: Սպասվում է արտգործնախարարների ևս մեկ հանդիպում՝ Նյու Յորքում, ուր նրանք վերջնականապես կհստակեցնեն Հայաստանի և Ադրբեջանի նախագահների հանդիպման օրը,-լրագրողների հետ այսօր կայացած հանդիպման ժամանակ ասաց քաղաքագետ, Միջազգային հարաբերությունների Մոսկվայի պետական համալսարանի դասախոս Անդրանիկ Միհրանյանը:

Անդրադառնալով Ռուսաստանի կողմից Ադրբեջանին զենք վաճառելուն՝ բանախոսը նկատեց՝ ռազմական հավասարակշռության խախտումն ավելի ու ավելի ակնհայտ է դառնում՝ անգամ նրանց համար, ովքեր չեն ուզում կորցնել ոչ Հայաստանին, ոչ Ադրբեջանին:

«Դա իսկապես անհանգստացնող փաստ է: Սակայն ես գիտեմ, Ռուսաստանը հասկանում է՝ Ադրբեջանին այսչափ զենքի մատակարարման արդյունքում առաջացած դիսբալանսը պետք է ուղղվի: Միաժամանակ Ռուսաստանը գիտակցում է, որ եթե ինքը Ադրբեջանին զենք չվաճառի, դա կանեն մյուս երկրները»,- ասաց քաղաքագետը:

Ինչ վերաբերում է ղարաբաղյան հակամարտության՝ Ղրիմի կամ Կոսովոյի հակամարտությունների հետ նույնականացմանը, Անդրանիկ Միհրանյանը նշեց՝ հակամարտությունները երբեք չեն կրկնում միմյանց, և հայելային անդրադարձերն ուղղակի բացառվում են: