Ձեր վստահելի աղբյուրը

Արվեստների հայկական խորհրդի նախագահ Վարդան Կարապետյանը լրագրողների հետ հանդիպման ժամանակ ազդարարեց «Ստանդարտ» ժամանակակից արվեստի միջազգային տրիենալեի մեկնարկը:

««Ստանդարտ» ժամանակակից արվեստի միջազգային տրիենալեն մտահղացվել է Հայաստանում, այն կրում է շրջիկ բնույթ՝ կախված ցուցահանդեսի թեմայից, ունենալու է տարբեր երթուղիներ՝ Հայաստանի տարածքով»,- նշեց նա՝ տեղեկացնելով, որ առաջին տրիենալեի երթուղին Գյումրիից շարունակվում է Երևան, ապա Երևանից՝ Սևան:

Վ. Կարապետյանի խոսքով, «Ստանդարտ-2017»-ը տեղի է ունենում Հայաստանի հարուստ պատմամշակութային համատեքստում. «Հայաստանն ամուր հիմք հանդիսացավ «Ստանդարտ» նախագծի մտահղացման և մշակման համար: Գյումրիի ժամանակակից արվեստի բիենալեն, Երևանի ակտիվ արվեստային իրականությունը, «Ոսկե Առյուծ» մրցանակը, որին երկու տարի առաջ Հայկական տաղավարն արժանացավ Վենետիկի բիենալեում և վերջին տարիների բազում այլ նվաճումները զգալիորեն դյուրացրել են մեր առջև դրված խնդիրը»: 

Նա տեղեկացրեց, որ տրիենալեի անվանումը ներշնչված է 1924 թ.-ին տպագրվող «Ստանդարտ»՝ հայկական ավանգարդ պարբերականի անունից։ 

Վ. Կարապետյանն ասաց, որ «Ստանդարտ» առաջին տրիենալեի համար Արվեստների Հայկական Խորհրդի  ղեկավարությունն իբրև գլխավոր համադրող է ընտրել Ադելինա Ջուբերյան ֆոն Ֆյուրշթենբերգին, որը եղել է նաև 2015 թ. Վենետիկի 56-րդ բիենալեում «Ոսկե Առյուծ» մրցանակը նվաճած Հայկական տաղավարի համադրողը։ Գործընկեր համադրողն է Ռուբեն Արևշատյանը: Այս տարվա խորագիրն է «Անալոգ լեռը», ոգեշնչված է  ֆրանսիացի սյուրռեալիստ գրող և բանաստեղծ Ռընո Դոմալի (1908-1944) համանուն «Անալոգ լեռը» անավարտ վեպից:

«Ստանդարտ» ժամանակակից արվեստի միջազգային տրիենալեն առաջին անգամ անցկացվելու է 2017թ.-ի հուլիսից մինչև դեկտեմբեր, իսկ այսուհետ տեղի է ունենալու երեք տարին մեկ անգամ: Առաջին տրիենալեին մասնակցում են 20-ից ավելի հայ և օտարազգի արվեստագետներ: Արվեստի այս փորձառության արդյունքում լինելու են ժամանակակից արվեստի մի շարք ցուցադրություններ, ինչպես նաև հյուրընկալվող և հայաստանաբնակ արվեստագետների միջև հանդիպումներ և համագործակցություններ, տեղային աշխատանքներ և պերֆորմանսներ:

Ասուլիսին ներկա Ադելինա Ջուբերյան ֆոն Ֆյուրշթենբերգը նշեց, որ երբ ինքնաթիռով գալիս են ու վերևից տեսնում Արարատը, այնուհետև վայրէջից հետո տեսնում հողին կանգնած՝ հնարավոր չէ չհիշել «Անալոգ լեռը» աշխատանքը:

«Արվեստն առհասարակ գոյություն չունի առանց հոգևոր մոտեցան. «Անալոգ լեռը» խորհրդանշական մի լեռ է, որը իմի է բերում երկինքն ու երկիրը, մի ուղի, որը պետք է դրսևորվի նյութական և մարդկային կերպարով, այլապես մեր վիճակը կատարելապես անհույս կլինի»: 

Այսօր ՀԲԸՄ-ի ցուցասրահում բացվելու է բրազիլաբնակ լուսանկարիչ (1899-1966 թթ.) Գասպար Գասպարյանի «Հեռավոր պատառիկներ, մոդեռնիստի հետադարձ հայացք» ցուցադրությունը: Համադրողն է Ռուբեն Արևշատյանը։ ՀայԱրտ Մշակութային կենտրոնում ցուցադրվելու է Իլյա և Էմիլիա Կաբակովների (Ռուսաստան/ԱՄՆ) «Մոցարտի երաժշտությունը լսելիս խնձոր վերցնելու 20 եղանակ» և «Համերգ ճանճի համար» ինստալացիաները:

Գյումրիում Ժողովրդական ճարտարապետության և քաղաքային կենցաղի թանգարանում և Սերգեյ Մերկուրովի թանգարանում ներկայացվելու են արվեստի գործեր, պերֆորմանսներ և աշխատանոցներ, որոնք ստեղծվելու են Գյումրիի արվեստագետ հանրույթի հետ համագործակցությամբ։ Արվեստագետ Վահագն Ղուկասյանի հետ համադրողական համագործակցությունը տեղի կունենա Երանուհի և Մարիամ Ասլամազյան քույրերի պատկերասրահում, որտեղ երկու նկարչուհիների մշտական հավաքածուի ընտրանին կզուգադրվի հետևյալ արվեստագետների գործերի հետ՝  Ֆրանսիսի Ալիս (Բելգիա), Գոհար Մարտիրոսյան (Հայաստան), Ռոզանա փալազյան (Բրազիլիա)։ Կցուցադրվեն նաև «Արվեստ՝ հանուն աշխարհի» արտադրության կարճամետրաժ ֆիլմեր:

Տրիենալեի երկրորդ մասը նախատեսված է սեպտեմբերին՝ Էրեբունիում, Սևանում և այլ քաղաքներում:

Վ. Կարապետյանը տեղեկացրեց, որ տրիենալեն տեղի է ունենում ՀՀ մշակույթի նախարարության հովանու ներքո և աջակցությամբ, համակազմակերպիչ հաստատությունների օժանդակությամբ և մասնակցությամբ՝ Ժնևում գործող «Արվեստ՝ հանուն աշխարհի» կազմակերպության, Երևանում գործող «Արվեստ Հայաստան հիմնադրամի», «Հասրաթյան» հիմնադրամի, Ինտելեկտուալ ռենեսանս հիմնադրամի, Հայաստանում Շվեյցարիայի դեսպանատան: