Ձեր վստահելի աղբյուրը

«Իրանի համար Հարավային Կովկասի տարածաշրջանը, հատկապես բարեկամական Հայաստանը կարևոր դերակատարություն ունի այս տարածաշրջանում ընթացող բոլոր զարգացումներում»,- Երևանում լրագրողների հետ հանդիպմանն ասաց տարածաշրջանային հարցերի իրանցի փորձագետ Էհսան Հուշմանդը:

Նրա խոսքով, իրանական հասարակությունը բավական լավ ծանոթ է հայաստանյան հասարակությանը, Իրանի հայկական համայնքը կարևոր դերակատարություն ունի Իրանի զարգացման, ներքին խնդիրների արծածման գործում, ընդհանրապես Իրանին ծառայություններ մատուցելու՝ որպես լիարժեք քաղաքացիներ, գործում:

Էհսան Հուշմանդն ընդգծեց, որ Իրանի և Հայաստանի հարաբերությունները զանազան հարթություններ,  ոլորտներ են ընդգրկում:

«Հետևաբար մենք պետք է ամեն ջանք գործադրենք,  որպեսզի առաջիկայում ավելի ընդարձակվեն ու զարգանան այդ հարաբերությունները»,- հավելեց իրանցի փորձագետը:

Է. Հուշմանդը նաև նշեց,  որ Հայաստանի և Իրանի թշնամիները պարբերաբար ջանքեր են գործադրում, որպեսզի վնասեն երկու երկրներին և նրանց հարաբերություններին:

«Տարածաշրջանում Իրանի որոշ մրցակից երկրներ այդքան էլ գոհ չեն  Իրանի և Հայաստանի հարաբերությունների զարգացումից, բայց, այս ամենը հաշվի առնելով, ուրախությամբ պետք է փաստենք, որ հարաբերություններն օրըստօրե սերտանում են»,- ընդգծեց իրանցի փորձագետ Էհսան Հուշմանդը: