Ձեր վստահելի աղբյուրը

Ապրիլյան պատերազմում զոհված, Արմավիրի մարզի Ոսկեհատ գյուղի բնակիչ Արամայիս Միքայելյանը հուլիսի 21-ին կդառնար 20 տարեկան:

Շարքային Արամայիսը 2016թ-ի ապրիլի 4-ին Ջրականում (Ջաբրայիլ) մղված թեժ մարտերի ընթացքում ցուցաբերելով խիզախություն, ոչնչացրել է հակառակորդի բազմաթիվ գրոհայինների: Զոհվել է մարտադաշտում: Հետմահու պարգևատրվել է Հայաստանի Հանրապետության «Արիություն» մեդալով:

Արամայիս Միքայելյանը ծնվել է 1996 թվականի հուլիսի 21-ին Սյունիքի մարզի Գորայք գյուղում։ Տասը տարեկանում ընտանիքի հետ տեղափոխվել է Ոսկեհատ։ Դպրոցն ավարտել է գերազանցությամբ, ընդունվել է Երևանի «Հայբուսակ» համալսարանի իրավաբանական ֆակուլտետ: Սովորել է նաև Մայր Աթոռ Ս. Էջմիածնի Հայորդաց տանը, զուգահեռ՝ ՀԲՄԸ-ի փայտի փորագրության բաժնում, Հայաստանի ԴՕՍԱՖ ռադիոկապի և տեղեկատվական տեխնոլոգիաների բաժնում՝ որպես ռադիոտեխնիկ։

Նա զբաղվել է քանդակագործությամբ և փայտի փորագրությամբ, հատկապես  սիրում էր խաչքարեր քանդակել։ Նա երազում էր զորացրվելուց հետո արվեստանոց բացել: Արամայիսի երազանքներն անկատար մնացին, բայց նրա հարազատները փորձում են անել ամենը, որպեսզի այսօր բոլորն էլ հաղորդակից դառնան զինվորի աշխատանքներին:

Ապրիլյան պատերազմի հերոսի գործն այժմ շարունակում են նրա մայրն ու եղբայրը: Նրանց  նախաձեռնությամբ հուլիսի 20-ին «Նարեկացի» արվեստի միությունում բացվել է Արամայիսի հեղինակային աշխատանքների ցուցադրությունը, բացի այդ տեղի է ունեցել «Քեզ հետ, բայց առանց քեզ» հուշագրքի շնորհանդեսը, որտեղ  ներկայացված են Արամայիս Միքայելյանի մոր և հարազատների հիշողությունները։

Մայրը՝ Լիլիթ Ավագյանը նախորդ տարի որդու մեդալը ստանալու ժամանակ լրագրողների հետ զրույցում ասել էր, թե ինչ խոսքերով է Արամայիսին բանակ ճանապարհել. «Բալես, ցավդ տանեմ, քեզ ճանապարհում եմ, մենակ խնդրում եմ՝ պարտքդ կատարիր փառքով, վերադարձիր անփորձանք: Այսօր բոլոր զգացմունքներս խառնվել են իրար՝ և հուզմունք, և ցավ, և խորը կսկիծ, միաժամանակ հպարտություն, որ արժանի զավակ եմ մեծացրել: Այս ցավն իմն է, չգիտեմ՝ կարող եմ հաղթահարել, թե ոչ: Շատ դժվար է: Հոգիս լացում է, կարոտն է խեղդում: Կարոտ, կարոտ…։ Միակ մխիթարանքս երևի սա է, որ հերոս որդի եմ ունեցել՝ գիտակցել է, որ մահվան է գնում»:

Նշենք, որ ապրիլյան քառօրյա պատերազմի ժամանակ զոհված զինծառայողներից  6-ն Արմավիրի մարզից էին: Հայրենիքի սահմանների պաշտպանության համար Արցախում հերոսաբար զոհված քաջ տղաներն էին` Արամ Աբրահամյանը, Սաշա Գալստյանը, Գոռ Կիրակոսյանը, Հովսեփ Կիրակոսյանը, Արամայիս Միքայելյանը, Բորիս Օզմանյանը:

Լուսանկարները՝ Արմինե Կարախանյանի ֆեյսբուքյան էջից: