Ձեր վստահելի աղբյուրը

Երևանի Շենգավիթ վարչական շրջանի ընդհանուր իրավասության դատարանում Ժիրայր Սեֆիլյանի, Հրայր Թոփչյանի, Սասունիկ Կիրակոսյանի, Հովհաննես Պետրոսյանի, Գալուստ Գրիգորյանի, Ներսես Պողոսյանի, Գևորգ Սաֆարյանի գործով այսօրվա դատավարությունն հետաձգվեց: Նախագահող դատավոր Տաթևիկ Գրիգորյանն ասաց, որ հետաձգման պատճառն այն է, որ Ժիրայր Սեֆիլյանի պաշտպան Արա Զաքարյանն ու Ներսես  Պողոսյանի պաշտպան Նինա Կարապետյանցը լքել են նիստերի դահլիճը և ներկա չեն դատավարությանը:

Հիշեցնենք, որ այսօր՝ նիստի սկզբում,փաստաբանները պահանջել էին, որ դատական նիստին ապահովեն իրենց պաշտպանյալների ներկայությունը, այլապես կլքեն նիտերի դահլիճը: Քանի որ ամբաստանյալները չբերվեցին նիստերի դահլիճ, պաշտպանները հեռացան: Դատարանը նրանց նկատմամբ դատական սանկցիա կիրառեց՝ պատասխանատվության ենթարկելու դիմումով դիմել Փաստաբանների պալատ:

Դատական հաջորդ նիստը տեղի կունենա հուլիսի 28-ին:

Ձեռք բերված փոխկապակցված ապացույցների բավարար համակցության հիման վրա զանգվածային անկարգություններ կազմակերպելու նախապատրաստության, կազմակերպված խմբի կողմից ապօրինի կերպով հրազեն, ռազմամթերք ձեռք բերելու, պահելու, փոխադրելու և շենքեր, շինություններ զավթելու նախապատրաստության համար Ժիրայր Սեֆիլյանին մեղադրանք է առաջադրվել ՀՀ քրեական օրենսգրքի 35-225-րդ հոդվածի 1-ին մասով, 235-րդ հոդվածի 3-րդ մասով, 35-219-րդ հոդվածի 3-րդ մասի 1-ին կետով, զանգվածային անկարգություններ կազմակերպելու նախապատրաստության համար Գևորգ Սաֆարյանին մեղադրանք է առաջադրվել ՀՀ քրեական օրենսգրքի 35-225-րդ հոդվածի 1-ին մասով, կազմակերպված խմբի կողմից ապօրինի կերպով հրազեն, ռազմամթերք ձեռք բերելու, պահելու, փոխադրելու համար Հրայր Թոփչյանին, Սասունիկ Կիրակոսյանին, Հովհաննես Պետրոսյանին, Գալուստ Գրիգորյանին և Ներսես Պողոսյանին մեղադրանքներ են ռաջադրվել ՀՀ քրեական օրենսգրքի 235-րդ հոդվածի 3-րդ մասով: