Ձեր վստահելի աղբյուրը

«Հայ-ռուսական հարաբերությունների օրակարգում ամենաբարդ, ամենակնճռոտ հարցերից մեկը ռուսական զենքի մատակարարման շարունակականությունն է Ադրբեջանին, որը լրացուցիչ քննարկումների, պարզաբանումների, լուծման կարիք ունի»,- «Մեդիա կենտրոնում» հարցազրույց-ասուլիսում ասաց ՀՀ ԱԺ արտաքին հարաբերությունների մշտական հանձնաժողովի նախագահ Արմեն Աշոտյանը:

Նրա խոսքով, այն բացատրությունները, որոնք լսում են որպես հիմնավորում, որ դա բացառապես տնտեսական գործարք է, իհարկե, իրենց տեսակետից քննադատությանը չեն դիմանում:
 
«Վերջին այցի փակ մասերում ունեցել ենք հնարավորություն խնդիրը մանրամասն քննարկել մեր ռուս գործընկերների հետ:  Նրանց մի մասը կիսում են մեր մտահոգությունները, հասկանում են խնդրի տարածաշրջանային կարևորությունը»,- ասաց ՀՀ ԱԺ արտաքին հարաբերությունների մշտական հանձնաժողովի նախագահը:

Նա նշեց, որ զենքն այնպիսի  հատկություն ունի, հատկապես եթե հայտնվում է ոչ հավասարակշռված քաղաքական ղեկավարների ձեռքերում, ինչպեսին Իլհամ Ալիևն է, կարող է  պարբերաբար կրակել և այստեղ տարածաշրջանային կայունության կարևորությունը շատ ավելի կարևոր պետք է դիտարկել ռուս գործընկերների հետ հարաբերություններում, քան պարզապես զենքի վաճառքից բխող տնտեսական կամ աշխարհաքաղաքական այլ շահեր:

Ինչ վերաբերում է ԵԱՏՄ-ից դուրս գալու մասին կարծիքներին,  Արմեն Աշոտյանն ասաց, որ նման կարծիք ՀՀ հասարակության մեջ եզակի, բայց հանդիպում են, այդ կարծիքի ձևավորման համար իրական ոչ տնտեսական, ոչ քաղաքական հիմքեր չկան: